1 Timotheo 2

1Basi, kwanza kabisa, nasihi kwamba dua, maombi, maombezi na shukrani zitolewe kwa ajili ya watu wote: 2kwa ajili ya wafalme na wote wenye vyeo vya juu, ili tuishi maisha ya amani na utulivu, tukimcha Mungu kikamilifu na tukistahili heshima. 3Hili ni jema, nalo linampendeza Mungu Mwokozi wetu, 4anayetaka watu wote waokolewe na waijue kweli. 5Kwa maana yuko Mungu mmoja, na mpatanishi mmoja kati ya Mungu na wanadamu, Kristo Yesu, ambaye yeye mwenyewe ni mwanadamu, 6aliyejitoa mwenyewe kuwa fidia kwa ajili ya wote. Huo ndio ushuhuda uliotolewa kwa wakati uliofaa. 7Kwa ajili ya kusudi hilo niliwekwa kuwa mhubiri na mtume (nasema kweli; sisemi uongo), mwalimu wa watu wa mataifa katika imani na kweli.

8Kwa hiyo nataka wanaume kila mahali waombe, wakiinua mikono mitakatifu, bila hasira wala ugomvi. 9Vivyo hivyo, nataka wanawake wavae kwa namna inayofaa, kwa adabu na kiasi, wala wasifanye nywele zilizosukwa, dhahabu, lulu au mavazi ya bei ghali kuwa ndiyo mapambo yao, 10bali matendo mema, kama inavyowafaa wanawake wanaodai kumheshimu Mungu. 11Mwanamke ajifunze kwa utulivu na kwa unyenyekevu kamili. 12Simruhusu mwanamke kufundisha wala kutumia mamlaka juu ya mwanamume; abaki mtulivu. 13Kwa maana Adamu aliumbwa kwanza, na baadaye Hawa. 14Tena Adamu hakuwa ndiye aliyedanganywa; mwanamke ndiye aliyedanganywa, akaanguka katika dhambi. 15Hata hivyo ataokolewa kwa njia ya kuzaa watoto, ikiwa wataendelea kudumu katika imani, upendo na utakatifu, pamoja na kiasi.