1 Timotheo 3

1Msemo huu ni wa kuaminika: mtu yeyote anayetaka kuwa mwangalizi anatamani kazi njema. 2Kwa hiyo mwangalizi ni lazima awe mtu ambaye hakuna anayeweza kumlaumu kwa haki: mwaminifu kwa mke wake mmoja, mwenye akili timamu, mwenye kiasi, anayeheshimika, mkarimu kwa wageni, anayeweza kufundisha, 3asiwe mlevi wala mgomvi, bali mpole, asiyependa mabishano, asiyependa fedha. 4Ni lazima aisimamie vizuri nyumba yake mwenyewe, na ahakikishe kwamba watoto wake wanamtii na wana heshima kwa kila namna. 5(Mtu asipojua kuisimamia nyumba yake mwenyewe, ataweza kulitunzaje kanisa la Mungu?) 6Asiwe mtu aliyeamini karibuni, asije akajaa kiburi na kuangukia hukumu ile ile aliyopata Ibilisi. 7Tena ni lazima pia aheshimiwe na watu walio nje ya kanisa, ili asianguke katika aibu na katika mtego wa Ibilisi.

8Vivyo hivyo, mashemasi ni lazima wawe watu wanaostahili heshima, wa kweli katika maneno yao, wasio walevi, wala wenye tamaa ya fedha. 9Ni lazima waishike siri ya imani kwa dhamiri safi. 10Wao pia wapimwe kwanza; kisha, kama hakuna shtaka dhidi yao, wahudumu. 11Vivyo hivyo, wanawake ni lazima wawe watu wanaostahili heshima, wasio wachongezi, wenye akili timamu na waaminifu katika kila jambo. 12Shemasi ni lazima awe mwaminifu kwa mke wake mmoja, na awasimamie vizuri watoto wake na nyumba yake. 13Wale wanaohudumu vizuri hujipatia nafasi nzuri na ujasiri mkubwa katika imani yao kwa Kristo Yesu.

14Nakuandikia mambo haya, ingawa natumaini kuja kwako hivi karibuni, 15ili, nikichelewa, ujue jinsi watu wanavyopaswa kuishi katika nyumba ya Mungu, yaani kanisa la Mungu aliye hai, nguzo na msingi wa kweli. 16Bila shaka yoyote, siri ya imani yetu ni kubwa: Yeye alidhihirishwa katika mwili wa kibinadamu, akathibitishwa kuwa mwenye haki na Roho, akaonekana na malaika, akahubiriwa kati ya mataifa, akaaminiwa ulimwenguni kote, akachukuliwa juu katika utukufu.