1 Timotheo 4

1Roho anasema waziwazi kwamba katika nyakati za baadaye watu fulani wataiacha imani na kuwafuata pepo wadanganyifu na mambo yanayofundishwa na mapepo. 2Mafundisho hayo huja kupitia waongo wanafiki ambao dhamiri zao zimechomwa kama kwa chuma cha moto. 3Wanawakataza watu kufunga ndoa, na kuwaamuru waepuke vyakula fulani, ambavyo Mungu aliviumba vipokelewe kwa shukrani na wale wanaoamini na wanaoijua kweli. 4Kwa maana kila kitu ambacho Mungu aliumba ni chema, wala hakuna kinachopaswa kukataliwa ikiwa kinapokelewa kwa shukrani, 5kwa sababu kinatakaswa kwa neno la Mungu na kwa maombi.

6Ukiwafundisha ndugu mambo haya, utakuwa mhudumu mwema wa Kristo Yesu, ukijilisha kwa maneno ya imani na ya mafundisho mazuri uliyoyafuata. 7Usijihusishe na ngano zisizomcha Mungu na za kipuuzi. Badala yake, jizoeze katika uchaji wa Mungu. 8Mazoezi ya mwili yana faida fulani, lakini uchaji wa Mungu una faida kwa kila namna, kwa kuwa una ahadi ya uzima wa sasa na wa ule ujao. 9Msemo huu ni wa kuaminika, nao unastahili kukubaliwa kabisa. 10Ndiyo sababu tunafanya kazi kwa bidii na kuvumilia matukano: tumeweka tumaini letu kwa Mungu aliye hai, Mwokozi wa watu wote, na hasa wa wale wanaoamini.

11Toa maagizo haya, na uyafundishe. 12Usimwache mtu yeyote akudharau kwa sababu wewe ni kijana, bali uwe kielelezo kwa waumini katika jinsi unavyosema na kuishi, katika upendo, katika imani na katika usafi. 13Hadi nitakapokuja, jitoe kwa kusoma Maandiko hadharani, kwa kuhubiri na kwa kufundisha. 14Usiipuuze karama iliyo ndani yako, uliyopewa kupitia neno la unabii wakati wazee walipokuwekea mikono. 15Yatekeleze mambo haya na ujitoe kwayo kikamilifu, ili kila mtu aone maendeleo yako. 16Jiangalie sana wewe mwenyewe na mafundisho yako. Dumu katika hayo, kwa maana ukifanya hivyo, utajiokoa wewe mwenyewe na wale wanaokusikiliza.