1 Timotheo 5

1Usimwambie kamwe mwanamume mzee maneno makali, bali umsihi kama ungemsihi baba yako. Watendee vijana wa kiume kama ndugu zako, 2wanawake wazee kama mama zako, na wanawake vijana kama dada zako, kwa usafi kamili.

3Uwape heshima na msaada wajane walio na shida kweli. 4Lakini mjane akiwa na watoto au wajukuu, wao wajifunze kwanza kuitekeleza imani yao kwa kuitunza familia yao wenyewe, na hivyo kuwalipa wazazi wao na babu na bibi zao, kwa maana hili linampendeza Mungu. 5Mjane aliye na shida kweli, aliyeachwa peke yake, ameweka tumaini lake kwa Mungu, naye huendelea kuomba na kumsihi Mungu amsaidie usiku na mchana. 6Lakini mjane anayeishi kwa ajili ya anasa amekufa hata akiwa bado hai. 7Toa maagizo haya pia, ili mtu yeyote asiwe na lawama. 8Mtu yeyote asiyewatunza jamaa zake, na hasa watu wa nyumbani mwake, ameikana imani, naye ni mbaya kuliko mtu asiyeamini.

9Mjane yeyote asiandikishwe katika orodha isipokuwa ana umri wa zaidi ya miaka sitini, na amekuwa mwaminifu kwa mume wake. 10Ni lazima ajulikane kwa matendo mema: kulea watoto, kuwakaribisha wageni, kuosha miguu ya watu watakatifu wa Mungu, kuwasaidia walio katika taabu, na kujitoa kwa kila aina ya kazi njema. 11Lakini usiwaandikishe wajane vijana katika orodha. Tamaa zao zinapowavuta mbali na Kristo, hutaka kuolewa, 12na hivyo wanajiletea hukumu kwa kuivunja ahadi yao ya kwanza. 13Zaidi ya hayo, wanazoea uvivu, wakizunguka nyumba kwa nyumba; wala si wavivu tu, bali pia wanakuwa wambea na wadakuzi, wakizungumza mambo wasiyopaswa kuzungumza. 14Kwa hiyo nataka wajane vijana waolewe, wazae watoto na kusimamia nyumba zao, wasimpe adui nafasi ya kutusema vibaya. 15Wengine tayari wamegeuka na kumfuata Shetani. 16Mwanamke mwamini akiwa na wajane katika jamaa yake, awasaidie, wala asiliachie kanisa mzigo huo, ili kanisa liweze kuwasaidia wajane walio na shida kweli.

17Wazee wanaoliongoza kanisa vizuri wahesabiwe kuwa wanastahili heshima maradufu, hasa wale wanaofanya kazi kwa bidii katika kuhubiri na kufundisha. 18Kwa maana Maandiko yanasema, “Usimfunge ng’ombe kinywa anapopura nafaka,” na, “Mfanyakazi anastahili kulipwa.” 19Usisikilize mashtaka dhidi ya mzee isipokuwa yanaungwa mkono na mashahidi wawili au watatu. 20Wale wanaoendelea kutenda dhambi wakemewe mbele ya wote, ili wengine nao waonywe. 21Mbele za Mungu na Kristo Yesu na malaika waliochaguliwa, nakuagiza kwa uzito uyashike maagizo haya bila kumhukumu mtu kabla, na usifanye lolote kwa upendeleo. 22Usiwe na haraka ya kumwekea mtu mikono, wala usishiriki dhambi za watu wengine. Jitunze uwe safi. 23Acha kunywa maji peke yake, unywe divai kidogo kwa ajili ya tumbo lako na magonjwa yako ya mara kwa mara.

24Dhambi za watu wengine ziko wazi, zikiwatangulia kwenda hukumuni; dhambi za wengine hujitokeza baadaye. 25Vivyo hivyo, matendo mema huonekana wazi, na hata yale yasiyoonekana hayawezi kubaki yamefichwa.