2 Timotheo 1

1Kutoka kwa Paulo, mtume wa Kristo Yesu kwa mapenzi ya Mungu, aliyetumwa kutangaza ahadi ya uzima ulio katika Kristo Yesu, 2kwa Timotheo, mwanangu mpendwa. Neema, rehema na amani ziwe nawe kutoka kwa Mungu Baba na kutoka kwa Kristo Yesu Bwana wetu.

3Ninamshukuru Mungu, ambaye ninamtumikia kwa dhamiri safi kama walivyofanya mababu zangu, kila ninapokukumbuka katika maombi yangu, kama ninavyofanya usiku na mchana. 4Nayakumbuka machozi yako, nami natamani sana kukuona, ili furaha yangu iwe kamili. 5Naikumbuka imani yako isiyo na unafiki, ambayo ilikaa kwanza ndani ya bibi yako Loisi na ndani ya mama yako Eunike, nami nina hakika kwamba sasa inakaa ndani yako pia. 6Ndiyo sababu nakukumbusha uichochee kama moto karama ambayo Mungu alikupa nilipokuwekea mikono yangu. 7Kwa maana Mungu hakutupa roho ya hofu, bali roho ya nguvu, ya upendo na ya akili timamu.

8Kwa hiyo usione haya kushuhudia habari za Bwana wetu, wala usinionee haya mimi, mfungwa wake. Badala yake, shiriki pamoja nami mateso kwa ajili ya Injili, ukitegemea nguvu ya Mungu. 9Yeye alituokoa na kutuita tuishi maisha matakatifu, si kwa sababu ya jambo lolote tulilotenda, bali kwa sababu ya kusudi lake mwenyewe na neema yake. Neema hii tulipewa katika Kristo Yesu kabla nyakati za milele hazijaanza, 10na sasa imedhihirishwa kwa kuonekana kwa Mwokozi wetu, Yesu Kristo. Yeye ameiangamiza mauti, na kupitia Injili ameleta nuruni uzima na kutoharibika. 11Kwa ajili ya Injili hii niliwekwa kuwa mhubiri, mtume na mwalimu. 12Ndiyo sababu ninateseka kama ninavyoteseka. Lakini sioni haya, kwa sababu namjua yule niliyemwamini, nami nina hakika kwamba yeye anaweza kukilinda kile nilichomkabidhi hadi siku ile. 13Shikilia kielelezo cha mafundisho mazima uliyoyasikia kutoka kwangu, pamoja na imani na upendo ulio katika Kristo Yesu. 14Ilinde hazina nzuri uliyokabidhiwa, kwa msaada wa Roho Mtakatifu anayekaa ndani yetu.

15Unajua kwamba kila mtu katika mkoa wa Asia ameniacha, wakiwemo Figelo na Hermojene. 16Bwana awahurumie watu wa nyumbani mwa Onesiforo, kwa maana mara nyingi aliniburudisha, wala hakuona haya kwamba nilikuwa katika minyororo. 17Badala yake, alipofika Roma, alinitafuta kwa bidii mpaka akaniona. 18Bwana amjalie kupata huruma kutoka kwa Bwana siku ile. Nawe unajua vizuri jinsi alivyosaidia kwa njia nyingi huko Efeso.