2 Timotheo 3

1Lakini elewa hili: katika siku za mwisho kutakuwa na nyakati za hatari. 2Watu watajipenda wenyewe na kupenda fedha. Watakuwa wenye majivuno, wenye kiburi na wenye matukano, wasiowatii wazazi wao, wasio na shukrani na wasio watakatifu. 3Watakuwa bila upendo, wasiosamehe, wachongezi, wasiojizuia, wakatili, wanaochukia mema. 4Watakuwa wasaliti, wasiojali, wenye kujivuna, wakipenda anasa kuliko kumpenda Mungu. 5Wataonekana kwa nje kuwa wanamcha Mungu, lakini wataikana nguvu ya uchaji huo. Usijihusishe na watu wa namna hiyo. 6Miongoni mwao wamo wale wanaojipenyeza ndani ya nyumba za watu na kuwatawala wanawake walio dhaifu, waliolemewa na dhambi na wanaoyumbishwa na tamaa za kila aina, 7wanaojifunza siku zote lakini hawawezi kamwe kufikia ujuzi wa kweli. 8Kama vile Yane na Yambre walivyompinga Musa, vivyo hivyo watu hawa wanaipinga kweli. Akili zao zimeharibika, nao wameshindwa katika jaribio la imani. 9Lakini hawatafika mbali, kwa sababu upumbavu wao utaonekana wazi kwa kila mtu, kama ilivyokuwa kwa wale wawili.

10Lakini wewe unajua yote kuhusu mafundisho yangu, mwenendo wangu, kusudi langu, imani yangu, uvumilivu wangu, upendo wangu, saburi yangu, 11mateso yangu na taabu zangu, mambo yaliyonipata huko Antiokia, Ikonio na Listra, na mateso niliyoyastahimili. Lakini Bwana aliniokoa katika yote. 12Kwa kweli, kila mtu anayetaka kuishi maisha ya kumcha Mungu katika Kristo Yesu atateswa. 13Lakini watu waovu na walaghai watazidi kuwa wabaya zaidi na zaidi, wakiwadanganya wengine na wao wenyewe wakidanganywa. 14Lakini wewe, dumu katika yale uliyojifunza na kuyahakikisha, kwa kuwa unawajua wale waliokufundisha, 15na jinsi tangu utoto umeyajua maandiko matakatifu, ambayo yanaweza kukupa hekima ya kukuongoza kwenye wokovu kupitia imani katika Kristo Yesu. 16Kila Andiko limetoka katika pumzi ya Mungu, nalo linafaa kwa kufundisha, kwa kukemea, kwa kurekebisha na kwa kulea katika haki, 17ili mtu aliye wa Mungu awe na uwezo kamili, amewezeshwa kwa kila kazi njema.