2 Timotheo 2

1Basi wewe, mwanangu, uwe hodari katika neema iliyo katika Kristo Yesu. 2Na yale uliyoyasikia kutoka kwangu mbele ya mashahidi wengi, uwakabidhi watu wanaoaminika, watakaoweza kuwafundisha wengine pia. 3Shiriki pamoja nami mateso, kama askari mwema wa Kristo Yesu. 4Hakuna askari aliye kazini anayejiingiza katika shughuli za kiraia; anataka kumpendeza afisa aliyemwandika jeshini. 5Vivyo hivyo, mwanariadha hapewi taji la ushindi asiposhindana kwa kufuata kanuni. 6Mkulima anayefanya kazi ngumu anastahili kuwa wa kwanza kula mavuno. 7Tafakari ninayokuambia, kwa maana Bwana atakupa ufahamu katika kila jambo.

8Mkumbuke Yesu Kristo, aliyefufuliwa kutoka kwa wafu, mzao wa Daudi, kama Injili yangu inavyotangaza. 9Kwa ajili ya Injili hii ninateseka, hata kufikia hatua ya kufungwa minyororo kama mhalifu. Lakini neno la Mungu halijafungwa minyororo. 10Kwa hiyo navumilia kila kitu kwa ajili ya watu waliochaguliwa na Mungu, ili wao pia waupate wokovu ulio katika Kristo Yesu, na pamoja nao utukufu wa milele. 11Msemo huu ni wa kuaminika: Kama tulikufa pamoja naye, tutaishi pia pamoja naye. 12Tukivumilia, tutatawala pia pamoja naye. Tukimkana, yeye pia atatukana. 13Tusipokuwa waaminifu, yeye hubaki mwaminifu, kwa maana hawezi kujikana mwenyewe.

14Endelea kuwakumbusha watu mambo haya, na uwaonye mbele za Bwana wasibishane juu ya maneno. Hilo halifai kitu, bali huwaharibu tu wale wanaosikiliza. 15Fanya kila juhudi kusimama mbele za Mungu ukiwa umepimwa na kukubaliwa, mfanyakazi asiye na jambo la kuonea haya, anayeutumia ujumbe wa kweli kwa usahihi. 16Kaa mbali na maneno matupu yasiyomcha Mungu, kwa sababu wale wanaojihusisha nayo watazidi kuwa waovu, 17na mafundisho yao yataenea kama donda ndugu. Himenayo na Fileto ni miongoni mwao. 18Wamepotea mbali na kweli, wakisema kwamba ufufuo umekwisha kutokea, nao wanaiharibu imani ya baadhi ya watu. 19Lakini msingi imara wa Mungu unasimama thabiti, ukiwa umetiwa muhuri kwa maneno haya: “Bwana anawajua walio wake,” na, “Kila mtu analitaja jina la Bwana na aache uovu.”

20Katika nyumba kubwa hakuna vyombo vya dhahabu na vya fedha peke yake, bali pia vya mbao na vya udongo; vingine ni kwa ajili ya shughuli maalum na vingine kwa matumizi ya kawaida. 21Wale wanaojitunza wakawa safi mbali na mambo hayo watakuwa vyombo vya kazi maalum, vilivyotakaswa, vyenye manufaa kwa Bwana wa nyumba, na tayari kwa kila kazi njema. 22Zikimbie tamaa za ujana, na ufuatilie haki, imani, upendo na amani, pamoja na wale wanaomwita Bwana kwa moyo safi. 23Usijihusishe na mabishano ya kipumbavu na ya kijinga; unajua kwamba huleta magomvi tu. 24Mtumishi wa Bwana hapaswi kuwa mgomvi, bali awe mwema kwa kila mtu, anayeweza kufundisha na mvumilivu kwa watu wagumu, 25akiwarekebisha kwa upole wale wanaompinga. Huenda Mungu atawapa toba nao wataijua kweli, 26warudiwe na akili na kuponyoka katika mtego wa Ibilisi, ambaye amewateka ili wafanye mapenzi yake.