1 Wathesalonike 1

1Kutoka kwa Paulo, Silwano na Timotheo, kwa kanisa la Wathesalonike, lililo la Mungu Baba na la Bwana Yesu Kristo. Neema na amani ziwe nanyi.

2Kila tunapowataja katika maombi yetu, tunamshukuru Mungu kwa ajili yenu nyote. 3Mbele ya Mungu na Baba yetu hatuachi kukumbuka kazi ambayo imani yenu inafanya, juhudi ambayo upendo wenu unajitwika, na uvumilivu ambao tumaini lenu katika Bwana wetu Yesu Kristo linawapa. 4Ndugu mnaopendwa na Mungu, tunajua kwamba amewachagua, 5kwa sababu Injili yetu iliwafikia si kwa maneno tu, bali pia kwa nguvu, kwa Roho Mtakatifu na kwa uhakika kamili. Mnajua tulikuwa watu wa namna gani kati yenu kwa faida yenu. 6Mliiga mfano wetu na wa Bwana. Ingawa neno liliwaletea dhiki kubwa, mlilipokea kwa furaha itokayo kwa Roho Mtakatifu, 7hata mkawa kielelezo kwa kila mwamini katika Makedonia na Akaya. 8Neno la Bwana limevuma kutoka kwenu, wala si katika Makedonia na Akaya tu: kila mahali watu wamesikia habari za imani yenu kwa Mungu. Kwa hiyo hakuna haja ya sisi kusema chochote. 9Kila mahali watu wanaeleza jinsi mlivyotukaribisha, na jinsi mlivyomgeukia Mungu mkiziacha sanamu, ili mwe watumishi wa Mungu aliye hai na wa kweli 10na kumngoja Mwana wake kutoka mbinguni. Mungu alimfufua kutoka kwa wafu: ndiye Yesu, anayetuokoa kutoka katika ghadhabu inayokuja.