Wakolosai 4

1Mabwana, watendeeni watumwa wenu haki na usawa, kwa sababu mnajua kwamba ninyi pia mna Bwana mbinguni.

2Endeleeni kuomba kwa bidii, na mkeshe mnapoomba, huku mkishukuru. 3Tuombeeni sisi pia, ili Mungu atufungulie mlango kwa ajili ya ujumbe wetu, tuweze kutangaza siri ya Kristo; ndiyo sababu niko katika minyororo. 4Ombeni ili niieleze wazi kama inavyonipasa.

5Ishini kwa hekima mnapohusiana na watu walio nje ya kanisa, mkitumia vizuri kila nafasi. 6Mazungumzo yenu yawe ya upole na ya kupendeza siku zote, yamekolezwa kwa chumvi, ili mjue jinsi ya kumjibu kila mtu.

7Tikiko atawaeleza habari zangu zote. Yeye ni ndugu mpendwa, mtumishi mwaminifu na mtumwa mwenzetu katika Bwana. 8Ninamtuma kwenu kwa sababu hiyo hasa, ili mjue hali yetu na ili awatie moyo. 9Anakuja pamoja na Onesimo, ndugu yetu mwaminifu na mpendwa, ambaye ni wa kwenu. Watawaeleza yote yanayotendeka huku.

10Aristarko, mfungwa mwenzangu, anawasalimu, na Marko, binamu wa Barnaba, anawasalimu pia. Mmekwisha kupata maagizo kumhusu: akifika kwenu, mkaribisheni. 11Yesu aitwaye Yusto naye anawasalimu. Kati ya waumini wote walio Wayahudi, hawa ndio pekee wanaofanya kazi pamoja nami kwa ajili ya ufalme wa Mungu, nao wamekuwa faraja kubwa kwangu. 12Epafra, aliye mmoja wenu na mtumishi wa Kristo, anawasalimu. Siku zote anapigana kwa bidii kwa ajili yenu katika maombi yake, akiomba msimame imara, mkiwa mmekomaa na mkiwa na hakika kamili juu ya yote anayoyataka Mungu. 13Ninaweza kumshuhudia kwamba anafanya kazi kwa bidii kwa ajili yenu na kwa ajili ya waumini wa Laodikia na Hierapoli. 14Rafiki yetu mpendwa Luka, yule daktari, anawasalimu, na Dema pia. 15Nisalimieni ndugu wa Laodikia, na Nimfa pamoja na kanisa linalokutana nyumbani kwake. 16Barua hii ikishasomwa kwenu, hakikisheni kwamba inasomwa pia katika kanisa la Laodikia, na kwamba ninyi pia mnaisoma barua itakayokuja kutoka Laodikia. 17Na mwambieni Arkipo, “Hakikisha unaitimiza kikamilifu huduma uliyokabidhiwa katika Bwana.”

18Mimi Paulo ninaandika salamu hii kwa mkono wangu mwenyewe. Kumbukeni kwamba niko katika minyororo. Neema iwe pamoja nanyi.