Wakolosai 1

1Kutoka kwa Paulo, mtume wa Kristo Yesu kwa mapenzi ya Mungu, na kutoka kwa Timotheo ndugu yetu, 2kwa watakatifu wa Mungu walioko Kolosai, ndugu waaminifu katika Kristo. Neema na amani ziwe nanyi kutoka kwa Mungu Baba yetu.

3Kila tunapowaombea, tunamshukuru Mungu, Baba wa Bwana wetu Yesu Kristo, 4kwa sababu tumesikia habari za imani yenu katika Kristo Yesu na upendo mlio nao kwa watakatifu wote. 5Imani hiyo na upendo huo vinatokana na tumaini lililohifadhiwa kwa ajili yenu mbinguni, tumaini mlilolisikia kwanza katika ujumbe wa kweli, yaani Injili 6iliyowafikia. Katika ulimwengu wote Injili hii inazaa matunda na kukua, na ndivyo ilivyofanya kwenu pia tangu siku mlipoisikia na kuijua neema ya Mungu katika kweli yake yote. 7Mlijifunza Injili hiyo kwa Epafra, mtumishi mwenzetu mpendwa, anayemtumikia Kristo kwa uaminifu kwa niaba yetu. 8Yeye ndiye aliyetueleza pia habari za upendo wenu katika Roho.

9Ndiyo sababu, tangu siku tuliposikia habari zenu, hatujaacha kusali kwa ajili yenu. Tunamwomba Mungu awajaze ujuzi wa mapenzi yake, pamoja na hekima yote na ufahamu unaotoka kwa Roho, 10ili mpate kuishi maisha yanayomstahili Bwana na kumpendeza katika kila jambo, mkizaa matunda katika kila aina ya kazi njema na kukua katika kumjua Mungu. 11Tunaomba mtiwe nguvu kwa uweza wote kwa nguvu zake tukufu, ili mweze kustahimili kila kitu kwa subira na furaha, 12na kumshukuru Baba, aliyewafanya mfae kushiriki urithi wa watakatifu wa Mungu katika nuru. 13Yeye ametuokoa kutoka katika nguvu za giza, akatuleta katika ufalme wa Mwana anayempenda. 14Ndani yake tuna ukombozi, yaani msamaha wa dhambi zetu. 15Mwana ni sura ya Mungu asiyeonekana, mzaliwa wa kwanza aliye juu ya viumbe vyote. 16Kwa maana ndani yake vitu vyote viliumbwa, vya mbinguni na vya duniani, vinavyoonekana na visivyoonekana, viwe viti vya enzi au tawala, watawala au mamlaka. Vyote vimeumbwa kupitia yeye na kwa ajili yake. 17Yeye yupo kabla ya vitu vyote, na vitu vyote vinashikamana pamoja ndani yake. 18Yeye pia ni kichwa cha mwili, yaani kanisa. Yeye ndiye mwanzo, wa kwanza kuzaliwa kutoka miongoni mwa wafu, ili awe na nafasi ya kwanza katika kila kitu. 19Kwa maana Mungu katika utimilifu wake wote alipendezwa kukaa ndani yake, 20na kupitia yeye kuvipatanisha vitu vyote na yeye mwenyewe, akileta amani kwa damu ya msalaba wake: vitu vyote kupitia yeye, vya duniani na vya mbinguni pia. 21Zamani mlikuwa mbali na Mungu, mkiwa maadui wake katika fikira zenu, kama matendo yenu maovu yalivyoonyesha. 22Lakini sasa mmepatanishwa kwa kifo cha Kristo katika mwili wake wa nyama na damu, ili Mungu awasimamishe mbele yake mkiwa watakatifu, bila dosari, na bila shtaka lolote, 23ikiwa tu mnadumu katika imani, mkiwa imara juu ya msingi wenu na thabiti, bila kuyumbishwa mbali na tumaini mlilopewa katika Injili mliyoisikia. Injili hii imehubiriwa kwa kila kiumbe chini ya mbingu, nami Paulo nimekuwa mtumishi wake.

24Sasa nafurahi kuteseka kwa ajili yenu. Katika mwili wangu mwenyewe ninakamilisha kile ambacho bado kinakosekana katika taabu za Kristo, kwa ajili ya mwili wake, yaani kanisa. 25Nimekuwa mtumishi wa kanisa kwa kazi ambayo Mungu alinikabidhi kwa faida yenu: kulijulisha neno la Mungu kikamilifu, 26siri iliyokuwa imefichwa katika nyakati zote na vizazi vyote vilivyopita, lakini sasa imefunuliwa kwa watakatifu wake. 27Mungu aliamua kuwajulisha jinsi siri hii ilivyo na utajiri mwingi na utukufu kati ya watu wa mataifa. Siri yenyewe ni hii: Kristo ndani yenu, tumaini la utukufu. 28Kristo ndiye tunayemtangaza. Tunamwonya kila mtu na kumfundisha kila mtu kwa hekima yote, ili tumsimamishe kila mtu mbele za Mungu akiwa amekomaa katika Kristo. 29Hilo ndilo lengo ninalolitaabikia, nikipambana kwa nguvu zake zinazofanya kazi ndani yangu kwa uweza mkubwa.