Wakolosai 2

1Nataka mjue jinsi ninavyojitahidi sana kwa ajili yenu, kwa ajili ya walio Laodikia, na kwa ajili ya wote ambao hawajawahi kukutana nami ana kwa ana. 2Lengo langu ni kwamba mioyo yao ipate nguvu na faraja, wakiwa wameunganishwa pamoja katika upendo, na kwamba wawe na utajiri wote wa ufahamu ulio thabiti kabisa, ili waijue siri ya Mungu, yaani Kristo mwenyewe. 3Ndani yake zimefichwa hazina zote za hekima na maarifa. 4Nawaambia haya ili mtu yeyote asiwapotoshe kwa hoja ambazo zinasikika tu kuwa za kweli. 5Huenda niko mbali nanyi kimwili, lakini kiroho niko pamoja nanyi. Nafurahi ninapoona maisha yenu ya utaratibu na nguvu thabiti ya imani yenu katika Kristo.

6Mlimpokea Kristo Yesu kuwa Bwana. Kwa hiyo maisha yenu yote yawe ndani yake, 7mkiwa na mizizi mirefu ndani yake, mmejengwa ndani yake, mmeimarishwa katika imani kama mlivyofundishwa, na mkifurika kwa shukrani kwa Mungu.

8Jihadharini, mtu yeyote asiwachukue mateka kwa falsafa ambayo ni udanganyifu mtupu. Inafuata mapokeo ya wanadamu na nguvu za msingi za ulimwengu, wala haimfuati Kristo. 9Kwa maana utimilifu wote wa nafsi ya Mungu unakaa ndani yake katika mwili, 10na ndani yake ninyi mmekamilishwa. Yeye ndiye kichwa juu ya kila mtawala na mamlaka. 11Ndani yake pia mlitahiriwa, kwa tohara ambayo haikufanywa kwa mkono wa mtu: maisha ya zamani yaliyotawaliwa na asili ya dhambi yalivuliwa kutoka kwenu, katika tohara anayoitoa Kristo. 12Mlizikwa pamoja naye katika ubatizo, na katika ubatizo mlifufuliwa pia pamoja naye kupitia imani katika nguvu ya Mungu, aliyemfufua kutoka kwa wafu. 13Mlikuwa wafu katika makosa yenu na katika kutotahiriwa kwa mwili wenu, lakini Mungu aliwahuisha pamoja naye. Alitusamehe makosa yetu yote. 14Aliifuta hati ya deni, pamoja na amri zake, iliyoandikwa dhidi yetu na kusimama kinyume chetu. Ameiondoa njiani, akiipigilia misumari msalabani. 15Aliwapokonya silaha watawala na wenye mamlaka, akawaaibisha hadharani, akiwaongoza kama mateka katika maandamano yake ya ushindi kwa njia ya msalaba.

16Kwa hiyo mtu yeyote asikae kuwahukumu kuhusu chakula na kinywaji, au kuhusu kuadhimisha sikukuu, mwezi mpya au sabato. 17Mambo haya ni kivuli cha yale yaliyokuwa yanakuja; uhalisi wenyewe ni Kristo. 18Msikubali mtu yeyote awanyang’anye tuzo: mtu anayependa kujishusha na kuabudu malaika, anayeegemea maono aliyoyaona, na anayejaa kiburi bure kwa akili inayowaza kibinadamu tu. 19Mtu kama huyo ameacha kushikamana na kichwa, yaani Kristo. Kutoka kwake mwili wote, ukipata mahitaji yake na kushikiliwa pamoja na maungio na kano zake, unakua kwa ukuaji anaoutoa Mungu.

20Kwa kuwa mlikufa pamoja na Kristo na kuwekwa huru kutoka kwa nguvu za msingi za ulimwengu, kwa nini mnaishi kana kwamba bado ni watu wa ulimwengu huu? Kwa nini mnakubali kanuni kama 21“Usishike, usionje, usiguse”? 22Vitu hivi vyote vimekusudiwa kutumika na kwisha. Kanuni hizo zinatokana na amri na mafundisho ya kibinadamu. 23Kanuni kama hizi zinaonekana kuwa za hekima, kwa ibada ambayo watu hujichagulia wenyewe, kwa kujishusha kwao na kwa kuutendea mwili kwa ukali. Lakini hazina faida yoyote katika kuzuia tamaa za asili ya dhambi.