Wakolosai 3

1Mmefufuliwa pamoja na Kristo; kwa hiyo tafuteni yale yaliyo juu, mahali ambapo Kristo ameketi upande wa kulia wa Mungu. 2Elekezeni mawazo yenu kwenye mambo ya juu, wala si kwenye mambo ya duniani. 3Kwa maana mlikufa, na uzima mlio nao sasa umefichwa pamoja na Kristo ndani ya Mungu. 4Kristo ndiye uzima wenu. Atakapofunuliwa, ninyi pia mtafunuliwa pamoja na yeye katika utukufu.

5Basi, ueni chochote ndani yenu kilicho cha dunia: uasherati, uchafu, ashiki, tamaa ovu, na tamaa ya mali, ambayo ni ibada ya sanamu. 6Kwa sababu ya mambo hayo, ghadhabu ya Mungu inakuja juu ya wale wasiotii. 7Ninyi pia mliishi zamani miongoni mwa watu hao, wakati maisha yenu yalipokuwa yametawaliwa na mambo hayo. 8Lakini sasa yavueni hayo yote, kila moja: hasira, milipuko ya hamaki, nia mbaya, kashfa, na maneno machafu yatokayo vinywani mwenu. 9Msiseme uongo ninyi kwa ninyi. Mmeuvua utu wa zamani pamoja na mienendo yake, 10mkauvaa utu mpya, ambao unafanywa upya na kukua katika ujuzi, kwa sura ya Muumba wake. 11Katika ubinadamu huu mpya haijalishi tena kama mtu ni Mgiriki au Myahudi, ametahiriwa au hajatahiriwa, mtu wa lugha ngeni au Mskithi, mtumwa au mtu huru. Kristo ndiye kila kitu, na yeye yumo ndani ya wote.

12Ninyi ni watu wa Mungu aliowachagua, watakatifu, na mnaopendwa na yeye. Kwa hiyo vaeni, kama mavazi, moyo wenye huruma, fadhili, unyenyekevu, upole na subira. 13Vumilianeni katika makosa yenu, na mtu akiwa na lalamiko dhidi ya mwenzake, msameheni. Bwana amewasamehe ninyi kwa ukarimu; nanyi lazima mfanye vivyo hivyo. 14Juu ya hayo yote vaeni upendo, ambao huunganisha kila kitu na kukifanya kikamilike. 15Amani anayoitoa Kristo iwe mwamuzi katika mioyo yenu. Mliitwa kwenye amani hiyo kama viungo vya mwili mmoja. Tena muwe watu wa shukrani. 16Neno la Kristo lifanye makao yake kwa wingi kati yenu, kwa hekima yote. Fundishaneni na kuonyana kwa zaburi, nyimbo za sifa na nyimbo anazotoa Roho, na mwimbieni Mungu kwa shukrani kutoka moyoni. 17Katika yote mnayosema na yote mnayotenda, tendeni kwa jina la Bwana Yesu, na kupitia yeye mshukuruni Mungu Baba.

18Ninyi wake, jitiisheni chini ya waume wenu; hivyo ndivyo inavyowafaa wale walio wa Bwana. 19Ninyi waume, wapendeni wake wenu, na kamwe msiwe wakali wala wenye chuki kwao.

20Ninyi watoto, fanyeni yote wazazi wenu wanayowaambia, kwa maana hilo ndilo linalopendeza katika Bwana. 21Akina baba, msiendelee kuwaudhi watoto wenu, la sivyo watakufa moyo. 22Watumwa, watiini mabwana wenu wa hapa duniani katika kila jambo. Msifanye kazi tu wanapowaangalia, ili kujipatia kibali chao, bali fanyeni kwa moyo usiogawanyika, kwa kumcha Bwana. 23Lolote mnalofanya, lifanyeni kwa moyo wenu wote, kama kwa ajili ya Bwana na si kwa ajili ya watu, 24mkijua kwamba mtapokea urithi kutoka kwa Bwana kuwa thawabu yenu. Ni Bwana Kristo mnayemtumikia kama watumwa. 25Kila mtu anayetenda mabaya atalipwa kulingana na ubaya wake, na Bwana hana upendeleo.