1 Wathesalonike 4

1Mwisho, ndugu, tunawaomba na kuwasihi katika Bwana Yesu: mlijifunza kutoka kwetu jinsi mnavyopaswa kuishi ili kumpendeza Mungu, nanyi mnaishi hivyo. Sasa fanyeni hivyo zaidi na zaidi. 2Mnajua maagizo tuliyowapa kwa mamlaka ya Bwana Yesu. 3Haya ndiyo mapenzi ya Mungu kwenu: kwamba mwe watakatifu. Jiepusheni na uasherati. 4Kila mmoja wenu ajue kuutawala mwili wake mwenyewe kwa utakatifu na heshima, 5si kwa tamaa za shauku kama watu wa mataifa, wasiomjua Mungu. 6Katika jambo hili mtu yeyote asivuke mpaka na kumdhulumu ndugu yake, kwa maana Bwana hulipiza kisasi kwa mambo hayo yote, kama tulivyowaambia mapema na kuwaonya kwa uzito. 7Kwa maana Mungu hakutuita tuwe wachafu, bali tuishi katika utakatifu. 8Kwa hiyo yeyote anayepuuza jambo hili hapuuzi agizo la mwanadamu, bali anampuuza Mungu mwenyewe, Mungu anayewapa Roho wake Mtakatifu.

9Kuhusu kupendana kama ndugu, hamhitaji tuwaandikie, kwa sababu Mungu mwenyewe amewafundisha kupendana. 10Na kwa kweli mnawapenda ndugu wote walioko kila mahali Makedonia. Lakini tunawasihi, ndugu, mpendane zaidi na zaidi. 11Jitahidini kuishi kwa utulivu, kushughulikia mambo yenu wenyewe, na kujipatia riziki kwa mikono yenu, kama tulivyowaagiza, 12ili watu walio nje ya kanisa waone kwamba mnaishi kwa adabu, nanyi msimtegemee mtu yeyote.

13Ndugu, hatutaki mbaki gizani kuhusu wale ambao wamelala, ili huzuni yenu isiwe kama ya wengine wasio na tumaini. 14Tunaamini kwamba Yesu alikufa na akafufuka; vivyo hivyo, kupitia Yesu, Mungu atawaleta pamoja naye wale ambao wamelala. 15Kwa mamlaka ya Bwana mwenyewe tunawaambia hivi: sisi tulio bado hai, tutakaobaki mpaka Bwana atakapokuja, hatutawatangulia kamwe wale waliolala. 16Bwana mwenyewe atashuka kutoka mbinguni kwa sauti kuu ya amri, kwa mwito wa malaika mkuu na kwa sauti ya tarumbeta ya Mungu, na wafu walio wa Kristo watafufuka kwanza. 17Kisha sisi ambao bado tuko hai, tuliobaki, tutanyakuliwa pamoja nao hadi mawinguni ili tumlaki Bwana angani. Tangu hapo tutakuwa pamoja na Bwana siku zote. 18Basi farijianeni kwa maneno haya.