1 Wathesalonike 3

1Kwa hiyo, tulipoona hatuwezi kuvumilia kungoja zaidi, tuliamua kubaki Athene peke yetu, 2tukawatumia Timotheo, ndugu yetu na mtenda kazi pamoja na Mungu katika Injili ya Kristo. Tulimtuma ili awaimarishe na kuwatia moyo katika imani yenu, 3ili yeyote kati yenu asitikiswe na dhiki hizi. Ninyi wenyewe mnajua kwamba tumewekwa kwa ajili ya mambo haya. 4Hata tulipokuwa pamoja nanyi, tuliwaambia tena na tena kwamba ni lazima tupate dhiki, na ndivyo ilivyotokea, kama mjuavyo. 5Kwa hiyo mimi pia, nilipoona siwezi kungoja zaidi, nilimtuma Timotheo ili ajue hali ya imani yenu. Niliogopa kwamba huenda mjaribu amewajaribu kwa namna fulani, na juhudi zetu zingekuwa bure.

6Lakini Timotheo amerudi kwetu sasa hivi kutoka kwenu, akiwa na habari njema za imani yenu na upendo wenu. Anatuambia kwamba siku zote mnatukumbuka kwa wema na mnatamani kutuona, kama sisi tunavyotamani kuwaona ninyi. 7Kwa hiyo, ndugu, katika shida zetu zote na dhiki, imani yenu imetufariji kuhusu ninyi. 8Sasa tunaweza kuishi kweli tena, ikiwa mnasimama imara katika Bwana. 9Tunaweza kumrudishia Mungu shukrani gani kwa ajili yenu, kwa furaha yote tuliyo nayo mbele ya Mungu wetu kwa sababu yenu? 10Usiku na mchana tunaomba kwa bidii kubwa tuwaone ana kwa ana na kujaza lolote ambalo bado linapungua katika imani yenu. 11Basi Mungu wetu na Baba mwenyewe, pamoja na Bwana wetu Yesu, atufungulie njia ya kuja kwenu. 12Kwa upande wenu, Bwana awajaze upendo hadi ufurike, upendo wa ninyi kwa ninyi na kwa watu wote, kama upendo tulio nao kwenu. 13Hapo mioyo yenu itasimama imara, bila lawama na mitakatifu mbele ya Mungu na Baba yetu, Bwana wetu Yesu atakapokuja pamoja na watakatifu wake wote.