1 Wathesalonike 5

1Kuhusu nyakati na tarehe, ndugu, hakuna haja ya sisi kuwaandikia. 2Ninyi wenyewe mnajua vizuri kwamba siku ya Bwana inakuja kama mwizi usiku. 3Wakati watu wanaposema, “Kila kitu ni shwari na salama,” maangamizi yatawaangukia ghafla, kama uchungu wa kuzaa unavyomjia mwanamke mjamzito, wala hapatakuwa na njia ya kuepuka. 4Lakini ninyi, ndugu, hamuishi gizani, hata siku ile iwashtukize kama mwizi. 5Ninyi nyote ni wana wa nuru na wana wa mchana. Sisi si watu wa usiku wala wa giza. 6Basi tusilale kama wengine, bali tukae macho na kuwa makini. 7Wanaolala hulala usiku, na walevi hulewa usiku. 8Lakini sisi ni wa mchana, kwa hiyo tuwe makini, tukivaa imani na upendo kama dirii, na tumaini la wokovu kama kofia ya chuma. 9Kwa maana Mungu hakutukusudia tupatwe na ghadhabu. Alitukusudia tupate wokovu kupitia Bwana wetu Yesu Kristo, 10aliyekufa kwa ajili yetu ili, tukiwa macho au tukiwa tumelala, tuishi pamoja naye. 11Basi endeleeni kutiana moyo na kujengana, kama mnavyofanya tayari.

12Tunawaomba, ndugu, mwatambue wale wanaofanya kazi kwa bidii kati yenu, wanaowaongoza katika Bwana na kuwarekebisha. 13Waheshimuni kwa heshima kubwa kabisa na kwa upendo kwa sababu ya kazi wanayoifanya. Dumisheni amani kati yenu. 14Tunawasihi, ndugu: waonyeni wale wanaoenda kinyume na utaratibu, wafarijini wenye moyo mdogo, wasaidieni walio dhaifu, na mvumilieni kila mtu. 15Angalieni kwamba mtu yeyote asilipe ubaya kwa ubaya. Siku zote tafuteni lililo jema, kwa ninyi kwa ninyi na kwa watu wote. 16Kuweni na furaha wakati wote. 17Msiache kuomba. 18Lolote litokealo, shukuruni; hivyo ndivyo Mungu anavyotaka kwenu katika Kristo Yesu. 19Msimfifishe Roho. 20Msione unabii kuwa kitu duni. 21Pimeni kila jambo; shikilieni yaliyo mema; 22kaeni mbali na uovu wa aina yoyote.

23Mungu wa amani mwenyewe awafanye watakatifu kikamilifu, na roho yenu, nafsi yenu na mwili wenu vilindwe vizima na bila lawama wakati wa kuja kwa Bwana wetu Yesu Kristo. 24Mungu anayewaita ni wa kuaminika, naye atalitimiza jambo hili.

25Ndugu, tuombeeni. 26Wasalimieni ndugu wote kwa busu takatifu. 27Kwa jina la Bwana nawaagiza kwa kiapo: hakikisheni barua hii inasomwa kwa ndugu wote. 28Neema ya Bwana wetu Yesu Kristo iwe pamoja nanyi.