2 Wathesalonike 1

1Kutoka kwa Paulo, Silwano na Timotheo, kwa kanisa la Wathesalonike, lililo la Mungu Baba yetu na la Bwana Yesu Kristo. 2Neema na amani ziwe nanyi kutoka kwa Mungu Baba na kutoka kwa Bwana Yesu Kristo.

3Ndugu, imetupasa kumshukuru Mungu kwa ajili yenu nyakati zote, na ni haki tufanye hivyo, kwa sababu imani yenu inakua kupita kiasi, na upendo alio nao kila mmoja wenu kwa wengine unazidi kuongezeka. 4Kwa hiyo sisi wenyewe tunawataja kwa fahari katika makanisa ya Mungu, kwa sababu ya uvumilivu wenu na imani yenu katika mateso yote na dhiki mnazostahimili. 5Haya yote ni ushahidi kwamba Mungu anahukumu kwa haki, na matokeo yake ni kwamba mtahesabiwa kuwa mnastahili ufalme wa Mungu, ambao kwa ajili yake mnateseka. 6Kwa maana ni haki kwa Mungu kuwalipa dhiki wale wanaowaletea ninyi dhiki, 7na kuwapa raha ninyi mnaopata dhiki, kama sisi pia, Bwana Yesu atakapotokea kutoka mbinguni pamoja na malaika wake wenye nguvu 8katika moto uwakao, akiwaadhibu wale wasiomjua Mungu na wale wanaokataa kuitii Injili ya Bwana wetu Yesu. 9Watapata adhabu ya maangamizi ya milele, wakitengwa mbali na uso wa Bwana na utukufu wa uweza wake, 10siku ile atakapokuja kutukuzwa kati ya watu wake watakatifu na kustaajabiwa na wote walioamini. Nanyi mko miongoni mwa waamini hao, kwa maana tulipowashuhudia, mliamini. 11Kwa kuzingatia hayo tunawaombea daima. Tunamwomba Mungu wetu awahesabu kuwa mnastahili maisha aliyowaitia, na kwa uweza wake atimize kila nia njema mliyo nayo na kila kazi ambayo imani yenu inaifanya. 12Hapo jina la Bwana wetu Yesu litaheshimiwa ndani yenu, nanyi mtaheshimiwa ndani yake, kwa neema ya Mungu wetu na ya Bwana Yesu Kristo.