2 Wathesalonike 2

1Ndugu, tuna ombi kuhusu kuja kwa Bwana wetu Yesu Kristo na kukusanywa kwetu ili tumlaki. 2Msikubali kutikiswa upesi mkapoteza akili zenu, wala kushtushwa na ujumbe wa kinabii, au neno la mdomo, au barua inayodaiwa kutoka kwetu, ikisema kwamba siku ya Bwana imekwisha kufika. 3Mtu yeyote asiwapotoshe, kwa njia yoyote ile. Kabla siku ile haijafika, ni lazima kwanza ukengeufu mkuu utokee, na yule mtu wa uasi afunuliwe, yule aliyehukumiwa kuangamia. 4Atapinga kila kinachoitwa mungu na kila kitu ambacho watu huabudu, na kujiinua juu ya hivyo vyote, hata ataketi katika hekalu la Mungu na kujitangaza kuwa yeye ni Mungu. 5Hakika mnakumbuka: niliwaambia jambo hili tena na tena nilipokuwa bado pamoja nanyi. 6Nanyi mnajua kinachomzuia sasa, ili afunuliwe wakati wake utakapofika tu. 7Kwa maana siri ya uasi tayari inafanya kazi, lakini ni mpaka yule anayeizuia sasa atakapoondolewa njiani. 8Hapo ndipo yule mwasi atafunuliwa, naye Bwana Yesu atamwangamiza kwa pumzi ya kinywa chake na kumkomesha kwa mng’ao wa kuja kwake. 9Yule mwasi anakuja kwa utendaji wa Shetani, akiwa na nguvu za kila aina, na ishara na maajabu ya uongo, 10na kila hila ovu ya kuwadanganya wale walio njiani kuelekea maangamizi. Wanapotea kwa sababu hawakukubali kuupokea upendo wa kweli, ambao ungewaokoa. 11Ndiyo sababu Mungu anawapelekea nguvu inayowapotosha, ili wauamini ule uongo, 12na hukumu iwajie wote waliokataa kuiamini kweli na badala yake wakachagua kufurahia yaliyo maovu.

13Lakini sisi imetupasa kumshukuru Mungu kwa ajili yenu siku zote, ndugu mnaopendwa na Bwana, kwa sababu Mungu aliwachagua, kama malimbuko ya mavuno, ili mwokolewe kupitia Roho anayewafanya watakatifu na kupitia imani yenu katika kweli. 14Aliwaitia jambo hili tulipowaletea Injili, ili mpate kumiliki utukufu wa Bwana wetu Yesu Kristo. 15Kwa hiyo, ndugu, endeleeni kusimama imara, na myashike kwa nguvu mapokeo tuliyowafundisha, iwe tuliyasema ana kwa ana au tuliyaandika katika barua yetu.

16Bwana wetu Yesu Kristo mwenyewe, pamoja na Mungu Baba yetu aliyetupenda na kutupa faraja ya milele na tumaini jema kwa neema, 17aifariji mioyo yenu na kuiimarisha katika kila tendo jema na kila neno jema.