1 Yohana 1

1Kile kilichokuwapo tangu mwanzo, tulichokisikia, tulichokiona kwa macho yetu wenyewe, tulichokitazama kwa makini na kukigusa kwa mikono yetu: hicho ndicho tunachozungumzia, yaani neno la uzima. 2Uzima huo ulidhihirishwa. Tumeuona, tunaushuhudia, na tunawatangazia uzima wa milele uliokuwa pamoja na Baba na ukadhihirishwa kwetu. 3Tunawatangazia ninyi pia yale tuliyoyaona na kuyasikia, ili nanyi mwe na ushirika pamoja nasi. Na ushirika tulio nao ni pamoja na Baba na pamoja na Mwana wake, Yesu Kristo. 4Tunayaandika mambo haya ili furaha yetu iwe kamili.

5Basi ujumbe tuliousikia kutoka kwake na tunaowatangazia ni huu: Mungu ni nuru, na ndani yake hamna giza hata kidogo. 6Tukidai kwamba tuna ushirika naye huku tukiendelea kutembea gizani, tunasema uongo, wala hatuishi kwa kufuata kweli. 7Lakini tukitembea katika nuru, kama vile yeye alivyo katika nuru, tuna ushirika sisi kwa sisi, na damu ya Yesu, Mwana wake, inaendelea kutusafisha kutoka kila dhambi. 8Tukidai kwamba hatuna dhambi, tunajidanganya wenyewe, na kweli haimo ndani yetu. 9Tunapoungama dhambi zetu, yeye ni mwaminifu na mwenye haki: atatusamehe dhambi zetu na kutusafisha kutoka kila aina ya kosa. 10Tukidai kwamba hatujawahi kutenda dhambi, tunamwita mwongo, na neno lake halimo ndani yetu.