2 Petro 3

1Wapendwa, hii sasa ni barua yangu ya pili kwenu. Katika barua zote mbili ninajitahidi kuziamsha akili zenu ziwe safi na wazi kwa kuwakumbusha 2myakumbuke yale ambayo manabii watakatifu walisema zamani, na amri ya Bwana na Mwokozi ambayo mitume wenu waliwaletea. 3Zaidi ya yote, fahamuni hili: katika siku za mwisho watakuja wadhihaki, wamejaa dhihaka, wakiishi kwa kufuata tamaa zao wenyewe. 4Watasema, “Ahadi hii ya kuja kwake iko wapi? Kwa maana tangu mababu zetu walipokufa, kila kitu kinaendelea kama kilivyokuwa tangu mwanzo wa uumbaji.” 5Wanachagua kupuuza jambo hili: zamani, kwa neno la Mungu, mbingu zilianza kuwepo, na dunia iliundwa kutoka katika maji na kwa njia ya maji. 6Kwa hayo mawili, maji na neno, ulimwengu wa wakati ule ulifunikwa na gharika, ukaangamizwa. 7Lakini kwa neno hilo hilo, mbingu na dunia za sasa zinahifadhiwa kwa ajili ya moto. Zinalindwa hadi siku ambayo watu wasiomcha Mungu watahukumiwa na kuangamizwa.

8Lakini ninyi, wapendwa, msilipuuze jambo hili moja: machoni pa Bwana siku moja ni sawa na miaka elfu, na miaka elfu ni sawa na siku moja. 9Bwana hachelewi kutimiza ahadi, kama watu wengine wanavyoelewa kuchelewa. Badala yake, anawavumilia ninyi. Hataki mtu yeyote aangamizwe, bali anataka watu wote wageuke na kutubu. 10Lakini siku ya Bwana itakuja kama mwizi. Siku hiyo mbingu zitapita kwa mvumo mkubwa, vitu vya msingi vitawaka moto na kusambaratika, na dunia pamoja na matendo yaliyofanywa juu yake yataonekana wazi.

11Kwa kuwa kila kitu kitasambaratishwa hivi, fikirini mnapaswa kuwa watu wa namna gani! Ishini maisha matakatifu na ya utauwa, 12mkingojea kuja kwa siku ya Mungu na kuiharakisha. Siku hiyo itaziwasha mbingu moto na kuzisambaratisha, na vitu vya msingi vitayeyuka kwa joto kali. 13Lakini tunangojea kwa hamu kile alichoahidi: mbingu mpya na dunia mpya, ambamo haki ina makao yake.

14Kwa hiyo, wapendwa, mnapoyangojea mambo haya, fanyeni juhudi ili yeye awakute bila doa wala kasoro, mkiwa na amani. 15Uhesabuni uvumilivu wa Bwana wetu kuwa wokovu. Paulo, ndugu yetu mpendwa, aliwaandikia pia kuhusu jambo hili, kwa hekima ambayo Mungu alimpa. 16Anafanya hivyo katika barua zake zote anapozungumza juu ya mambo haya. Baadhi ya mambo ndani yake ni magumu kueleweka, na watu wasiofundishwa na wasio thabiti huyapindisha, kama wanavyoyapindisha Maandiko mengine, na hivyo wanajiletea maangamizi yao wenyewe. 17Kwa hiyo, wapendwa, kwa kuwa mmeambiwa haya mapema, kaeni macho. Msikubali upotofu wa watu wasiofuata sheria uwachukue na kuwaangusha kutoka mahali penu imara. 18Badala yake, endeleeni kukua katika neema inayotoka kwa Bwana wetu na Mwokozi Yesu Kristo, na katika kumjua yeye. Utukufu na uwe wake, sasa na hadi siku ya milele. Amina.