2 Petro 2

1Zamani walikuwako manabii wa uongo miongoni mwa watu wa Israeli, na vivyo hivyo watakuwako walimu wa uongo miongoni mwenu. Wataingiza kimyakimya mafundisho yanayoleta maangamizi, na hata watamkana Bwana aliyewanunua. Hivyo watajiletea maangamizi ya haraka. 2Watu wengi watafuata tabia zao zisizo na haya, na kwa sababu yao njia ya kweli itasemwa vibaya. 3Kwa uchoyo wao watajipatia fedha kutoka kwenu kwa hadithi walizozibuni wenyewe. Lakini hukumu iliyotolewa juu yao zamani haijakaa bure, na maangamizi yao hayajalala usingizi.

4Mungu hakuwahurumia malaika waliotenda dhambi. Aliwatupa chini katika Tartaro, akawakabidhi kwa minyororo ya giza nene, ambako wanalindwa mpaka hukumu. 5Wala hakuuhurumia ulimwengu wa kale. Alipoleta gharika juu ya ulimwengu wa watu wasiomcha Mungu, alimlinda Nuhu pamoja na watu wengine saba, Nuhu aliyetangaza haki. 6Aliihukumu miji ya Sodoma na Gomora iangamizwe, akaiteketeza hadi ikawa majivu, akaifanya kuwa mfano wa yale yatakayowapata wasiomcha Mungu. 7Lakini alimwokoa Lutu, mtu mwenye haki aliyekuwa amechoshwa sana na mwenendo usio na haya wa watu wasiojali sheria. 8Kwa kuwa aliishi kati yao siku baada ya siku, mtu huyo mwenye haki aliitesa nafsi yake yenye haki kwa sababu ya matendo maovu aliyoyaona na kuyasikia. 9Ikiwa Mungu alifanya hayo yote, ni wazi kwamba Bwana anajua jinsi ya kuwaokoa watauwa kutoka katika majaribu yao, na jinsi ya kuwaweka wadhalimu chini ya adhabu mpaka siku ya hukumu, 10hasa wale wanaofuata tamaa za mwili zinazonajisi, na wanaodharau mamlaka ya Bwana. Wakiwa jasiri kupita kiasi na wenye kiburi, hawaogopi kuwatukana wenye utukufu, 11wakati hata malaika, walio wakuu zaidi kwa nguvu na uwezo, hawaleti juu yao hukumu ya matusi. 12Lakini watu hawa ni kama wanyama wasioweza kufikiri, wanaotawaliwa na silika, waliozaliwa ili wakamatwe na kuuawa. Wanatukana wasiyoyaelewa, na kama wanyama hao, wao pia wataangamizwa, 13wakipata madhara kama malipo ya madhara waliyoyatenda. Wanaona ni raha kujifurahisha waziwazi mchana. Wao ni madoa na kasoro, wakifurahia udanganyifu wao wanapokula pamoja nanyi. 14Macho yao daima yanatafuta uzinzi, wala hayatosheki na dhambi. Wanawavuta kwa chambo watu ambao bado hawajasimama imara. Wamezoea uchoyo mpaka mioyo yao imebobea ndani yake. Ni watu walio chini ya laana! 15Wameiacha njia iliyonyooka, wakapotea, wakaifuata njia ya Balaamu mwana wa Bosori, aliyependa malipo aliyoweza kupata kwa kutenda mabaya. 16Lakini alikemewa kwa kosa lake la kuvunja sheria. Punda, ambaye hawezi kuongea, alizungumza kwa sauti ya binadamu, akamzuia nabii katika wazimu wake.

17Watu hawa ni chemchemi zilizokauka, ukungu unaofukuzwa na upepo mkali. Giza jeusi kabisa limewekwa kwa ajili yao. 18Wanasema maneno makubwa yasiyo na maana, na kwa chambo cha tamaa za mwili zisizo na haya wanawanasa watu ambao ndio kwanza wanaanza kuwakimbia wale wanaoishi katika upotevu. 19Wanawaahidi uhuru, lakini wao wenyewe ni watumwa wa uharibifu. Kwa maana mtu yeyote anayeshindwa na kitu fulani amekuwa mtumwa wa kitu hicho. 20Kwa maana ikiwa wameponyoka uchafu wa ulimwengu kwa kumfahamu Bwana na Mwokozi Yesu Kristo, kisha wakanaswa tena humo na kushindwa, wanaishia katika hali mbaya kuliko walivyokuwa mwanzoni. 21Ingekuwa bora kwao kama hawangeijua kamwe njia ya haki, kuliko kuijua kisha kuitupa amri takatifu waliyokabidhiwa. 22Methali ya kweli imetimia kwao: “Mbwa hurudi kwenye matapishi yake,” na, “Nguruwe, akiisha kuoshwa, hurudi kujigaragaza matopeni.”