2 Petro 1

1Kutoka kwa Simeoni Petro, mtumishi na mtume wa Yesu Kristo, kwa wale ambao, kwa haki ya Mungu wetu na Mwokozi Yesu Kristo, wamepokea imani yenye thamani sawa na imani yetu. 2Neema na amani ziwe nanyi kwa wingi zaidi na zaidi katika ujuzi wenu wa Mungu na wa Yesu Bwana wetu.

3Kwa nguvu zake za kimungu tumepewa kila kipawa kinachoongoza kwenye uzima na utauwa, kupitia kumjua yule aliyetuita kwa utukufu na wema wake mwenyewe. 4Kupitia hivyo ametupa ahadi zake, zenye thamani na kuu kuliko nyingine zote, ili kupitia ahadi hizo mpate kushiriki asili ya kimungu, kwa kuwa mmeuepuka uharibifu ambao tamaa imeuleta ulimwenguni. 5Kwa sababu hiyo hiyo, wekeni bidii yote ili imani yenu itoe wema, na wema utoe ufahamu, 6ufahamu utoe kujitawala, kujitawala kutoe uvumilivu, uvumilivu utoe utauwa, 7utauwa utoe kuwapenda waumini wenzenu, na kuwapenda wenzenu kutoe upendo. 8Kwa maana mambo haya yakiwa yenu kwa wingi unaozidi, hayatawaacha mkiwa bure au bila matunda katika kumjua Bwana wetu Yesu Kristo. 9Mtu asiye na mambo hayo hawezi kuona kilicho mbele yake, naye ni kama kipofu; amesahau kwamba dhambi alizotenda zamani zilioshwa. 10Basi, ndugu, jibidisheni hata zaidi kuhakikisha kwamba wito wa Mungu na uteule wake kwenu vinasimama imara; kwa maana mkitenda mambo haya hamtajikwaa na kuanguka kamwe. 11Hivyo ndivyo mtakavyokaribishwa kwa ukamilifu na kwa ukarimu mkubwa katika ufalme wa milele wa Bwana wetu na Mwokozi, Yesu Kristo.

12Kwa hiyo nitaendelea kuwakumbusha mambo haya, ingawa tayari mnayajua na mnasimama imara katika kweli iliyowafikia. 13Maadamu bado ninaishi katika hema hii ya mwili, naona ni haki kuwaweka macho kwa kuwakumbusha, 14kwa sababu najua kwamba karibuni lazima niiweke kando hema hii, kama Bwana wetu Yesu Kristo alivyonionyesha. 15Nami nitahakikisha kwamba baada ya mimi kuondoka, mtaweza kuyakumbuka mambo haya wakati wowote mtakapoyahitaji.

16Tulipowaambia habari za nguvu za Bwana wetu Yesu Kristo na kuja kwake, hatukuwa tukisimulia hadithi za ujanja zilizobuniwa na watu. Tuliuona ukuu wake kwa macho yetu wenyewe. 17Alipewa heshima na utukufu na Mungu Baba, maneno haya yalipomjia kutoka kwa Utukufu wenye Fahari: “Huyu ni Mwana wangu ninayempenda sana; ninapendezwa naye kabisa.” 18Sisi wenyewe tuliisikia sauti hiyo ikija kutoka mbinguni, tulipokuwa pamoja naye juu ya mlima mtakatifu. 19Kwa hiyo ujumbe wa manabii ni wa hakika zaidi kwetu. Mnafanya vizuri kuukazia macho, kama taa inayoangaza mahali pa giza na uchafu, mpaka siku ipambazuke na nyota ya alfajiri ichomoze mioyoni mwenu. 20Juu ya yote, fahamuni hili: hakuna unabii katika Maandiko unaotokana na ufafanuzi wa mtu mwenyewe, 21kwa sababu hakuna unabii uliowahi kuja kwa sababu binadamu aliutaka; bali watu walisema kutoka kwa Mungu Roho Mtakatifu alipokuwa akiwabeba.