1 Petro 5

1Kwa hiyo nawaomba wazee walio miongoni mwenu. Mimi pia ni mzee kama wao, shahidi wa mateso ya Kristo, na mmoja atakayeshiriki utukufu ambao uko karibu kufunuliwa. 2Lichungeni kundi la Mungu lililo kati yenu kama wachungaji. Litunzeni kwa hiari yenu, kama Mungu anavyotaka, wala si kwa sababu mmelazimishwa; si ili mjipatie fedha, bali kwa moyo wa kupenda na kwa utayari. 3Msiwatawale kwa ukali watu mliokabidhiwa; badala yake, mwe kielelezo ambacho kundi litakifuata. 4Kisha Mchungaji Mkuu atakapofunuliwa, mtapewa taji la utukufu ambalo halitanyauka kamwe. 5Hali kadhalika, ninyi mlio vijana, wanyenyekeeni wazee. Na ninyi nyote, mnapohusiana ninyi kwa ninyi, jifungieni unyenyekevu kama vazi, kwa sababu “Mungu anasimama dhidi ya wenye kiburi, lakini wanyenyekevu anawapa neema.”

6Basi jinyenyekezeni chini ya mkono wenye nguvu wa Mungu, ili awainue wakati utakapofika. 7Fanyeni hivyo kwa kumtupia yeye kila wasiwasi mlio nao, kwa sababu ninyi ni wa thamani kwake. 8Kuweni na akili timamu. Kesheni. Ibilisi, mpinzani wenu, anazurura kama simba anayenguruma, akiwinda mtu wa kummeza. 9Simameni imara dhidi yake, mkiishikilia imani yenu. Mnajua kwamba ndugu zenu kote ulimwenguni wanavumilia mateso hayo hayo. 10Baada ya kuteseka kwa muda mfupi, Mungu wa neema zote, aliyewaita kwenye utukufu wake wa milele katika Kristo, yeye mwenyewe atawarejesha, atawafanya imara na wenye nguvu, na kuwasimika juu ya msingi thabiti. 11Uweza ni wake milele na milele. Amina.

12Nimewaandikia barua hii fupi kupitia Silwano, ambaye namhesabu kuwa ndugu mwaminifu. Naandika ili kuwatia moyo na kushuhudia kwamba neema hii ni neema ya kweli ya Mungu. Simameni imara ndani yake. 13Yule aliye Babeli, aliyechaguliwa pamoja nanyi, anawasalimu, na vivyo hivyo mwanangu Marko. 14Salimianeni ninyi kwa ninyi kwa busu lenye upendo. Ninyi nyote mlio wa Kristo na mwe na amani.