1 Petro 3

1Vivyo hivyo, wake, wanyenyekeeni waume zenu wenyewe. Hivyo, kama baadhi yao hawalitii neno, mwenendo wenu utawavuta hata bila ninyi kusema neno, 2watakapoona jinsi mwenendo wenu ulivyo safi na jinsi mnavyomcha Mungu. 3Pambo lenu lisiwe la nje: nywele zilizosukwa, vito vya dhahabu na nguo mnazovaa. 4Bali liwe utu wa ndani uliofichika moyoni, uliopambwa kwa kitu kisichoharibika kamwe, yaani roho ya upole na ya utulivu, ambayo Mungu anaithamini sana. 5Hivi ndivyo wanawake watakatifu wa zamani, waliomtumaini Mungu, walivyojipamba: waliwanyenyekea waume zao wenyewe. 6Ndivyo Sara alivyomtii Ibrahimu, akamwita bwana wake. Ninyi mmekuwa binti zake, ikiwa mnatenda mema bila kutishwa na kitu chochote.

7Vivyo hivyo, waume, kaeni na wake zenu kwa ufahamu. Mpeni mwanamke heshima kama chombo kilicho dhaifu zaidi, na kama mtu atakayerithi pamoja nanyi neema ya uzima, ili kusiwe na kitu kinachozuia maombi yenu.

8Kwa ufupi: ninyi nyote mwe na umoja wa mawazo, mshiriki hisia za wenzenu, mpendane kama ndugu, mwe na mioyo ya huruma na mawazo ya unyenyekevu. 9Msimlipe mtu ubaya kwa ubaya wala matusi kwa matusi. Badala yake, wabarikini, kwa sababu Mungu aliwaita kwa ajili hiyo, ili mrithi baraka. 10Kwa maana yeyote anayetaka kupenda uzima na kuona siku njema, lazima azuie ulimi wake na maovu na midomo yake na maneno ya udanganyifu; 11lazima aache maovu na kutenda mema, aitafute amani na kuikimbilia. 12Kwa maana Bwana huwaangalia wenye haki kwa macho yake, na hutega masikio yake kwa maombi yao, lakini uso wa Bwana unawapinga wale wanaotenda maovu.

13Na ni nani atakayewatendea ubaya ikiwa mmejitoa kutenda mema? 14Lakini tuseme mnateseka kwa sababu ya haki: hata hivyo ninyi ni heri. Msiogope vitisho vyao, wala msitikisike. 15Badala yake, katika mioyo yenu mkirini Kristo kuwa Bwana mtakatifu. Mwe tayari wakati wote kujitetea mbele ya yeyote anayewauliza sababu ya tumaini mlilo nalo. 16Lakini jibuni kwa upole na kwa kumcha Mungu, mkiwa na dhamiri njema, ili watu wanapowasema vibaya, wale wanaobeza maisha yenu mema katika Kristo waone aibu. 17Baada ya yote, ni bora kuteseka kwa kutenda mema, kama Mungu anataka hivyo, kuliko kuteseka kwa kutenda mabaya. 18Kwa maana Kristo pia aliteseka kwa ajili ya dhambi mara moja tu kwa wakati wote, mwenye haki kwa ajili ya wasio na haki, ili awafikishe ninyi kwa Mungu. Aliuawa katika mwili, lakini akahuishwa katika roho. 19Katika roho hiyo alikwenda pia akawatangazia roho walio gerezani, 20ambao zamani walikuwa wamekataa kutii, wakati Mungu alipongoja kwa uvumilivu katika siku za Nuhu, safina ilipokuwa ikijengwa. Ndani ya safina hiyo watu wachache, wanane kwa jumla, walivuka maji salama. 21Maji hayo yanaashiria ubatizo, ambao sasa unawaokoa ninyi pia. Ubatizo si kuosha uchafu wa mwili, bali ni ahadi kwa Mungu itokayo katika dhamiri njema. Unawaokoa kupitia ufufuo wa Yesu Kristo. 22Yeye alikwenda mbinguni na sasa yuko mkono wa kuume wa Mungu, na malaika, mamlaka na nguvu wamewekwa chini yake.