1 Petro 2

1Kwa hiyo vueni ubaya wote na kila aina ya udanganyifu, unafiki, wivu na usengenyaji wote. 2Kama vichanga vilivyozaliwa karibuni, tamanini sana maziwa safi ya neno la Mungu, ili kwa hayo mkue mpaka mfikie wokovu, 3kwa kuwa mmeonja kwamba Bwana ni mwema.

4Mnamjia yeye, jiwe lililo hai ambalo wanadamu walilikataa kuwa halifai, lakini Mungu alilichagua na kulithamini. 5Nanyi wenyewe, kama mawe yaliyo hai, mnajengwa kuwa nyumba kwa ajili ya Roho, ili mtumike kama ukuhani mtakatifu na kumtolea Mungu, kupitia Yesu Kristo, dhabihu za kiroho anazozipokea kwa furaha. 6Kwa maana Maandiko yanasema hivi: “Angalia, ninaweka katika Sayuni jiwe, jiwe kuu la pembeni, lililochaguliwa na lenye thamani; na yeyote anayemwamini yeye hataaibishwa kamwe.” 7Basi heshima ni yenu ninyi mnaoamini. Lakini kwa wale wasioamini, “Jiwe lilelile ambalo wajenzi walilikataa limekuwa jiwe kuu la pembeni,” 8na “jiwe la kujikwalia, mwamba unaowaangusha.” Wanajikwaa kwa sababu wanakataa kulitii neno, na huo ndio mwisho waliowekewa.

9Lakini ninyi ni jamii teule, ukuhani wa kifalme, taifa takatifu, watu ambao Mungu amewafanya kuwa mali yake mwenyewe, ili mtangaze matendo makuu ya yule aliyewaita kutoka gizani kuingia katika nuru yake ya kustaajabisha. 10Wakati fulani hamkuwa watu wamoja; sasa ni watu wa Mungu. Hamkuwa mmeonyeshwa rehema; sasa Mungu amewaonyesha rehema.

11Wapendwa, mnaishi hapa kama wakaaji wa kigeni na wageni. Kwa hiyo nawasihi mjiepushe na tamaa za mwili, kwa maana zinapigana dhidi ya nafsi zenu. 12Mwenendo wenu kati ya watu wasiomjua Mungu uwe wa heshima. Hapo, ingawa wanawasema kuwa watenda mabaya, watayaona matendo yenu mema wao wenyewe na kumtukuza Mungu siku atakapowajia.

13Kwa ajili ya Bwana, nyenyekeeni kila mamlaka iliyowekwa na wanadamu: Kaisari, aliye na cheo cha juu kuliko wote, 14na watawala anaowatuma kuadhibu maovu na kusifu mwenendo mwema. 15Kwa maana haya ndiyo mapenzi ya Mungu: kwamba kwa kutenda mema mnyamazishe ujinga wa watu wapumbavu. 16Enendeni kama watu huru. Uhuru wenu si kinyago cha kuficha uovu; ninyi ni watumwa walio mali ya Mungu. 17Mpeni kila mtu heshima. Wapendeni ndugu zenu katika imani. Mcheni Mungu. Mpeni Kaisari heshima.

18Watumishi wa nyumbani, wanyenyekeeni mabwana wenu kwa heshima kuu, wala si wale wema na wenye upole tu, bali hata wale wakorofi na wakali. 19Kwa maana hili linapata kibali: mtu anapovumilia maumivu akiteswa kwa udhalimu, kwa kuwa anamkumbuka Mungu. 20Kwa maana kuna fahari gani kuvumilia mapigo mkiwa mmetenda mabaya? Lakini mkitenda mema na kuteswa kwa sababu hiyo, nanyi mkavumilia, hilo linapata kibali mbele za Mungu. 21Ni kwa ajili ya hili Mungu aliwaita, kwa sababu Kristo pia aliteswa kwa ajili yenu, akawaachia mfano wa kunakili, ili mtembee katika nyayo zake. 22Hakutenda dhambi kamwe, na hakuna mtu aliyekuta udanganyifu katika kinywa chake. 23Watu walipomtukana, hakujibu matusi kwa matusi. Alipoteswa, hakutoa vitisho, bali aliendelea kujikabidhi kwa Mungu anayehukumu kwa haki. 24Yeye mwenyewe alizibeba dhambi zetu katika mwili wake mwenyewe hadi msalabani, ili tuachane na dhambi na tuishi kwa ajili ya haki. Kwa majeraha aliyoyapata ninyi mmeponywa. 25Kwa maana mlikuwa mkitangatanga kama kondoo waliopotea, lakini sasa mmemrudia Mchungaji anayezilinda nafsi zenu.