1 Yohana 2

1Wanangu wapendwa, nawaandikia haya ili msitende dhambi. Lakini mtu yeyote akitenda dhambi, tunaye mtetezi mbele ya Baba, Yesu Kristo, aliye mwenye haki. 2Yeye mwenyewe ndiye dhabihu inayofanya upatanisho kwa ajili ya dhambi zetu, wala si kwa ajili ya dhambi zetu peke yake, bali kwa ajili ya dhambi za ulimwengu wote.

3Tunaweza kuwa na hakika kwamba tumemjua kwa njia hii: tukizishika amri zake. 4Yeyote anayesema, “Nimemjua,” lakini hashiki amri zake, ni mwongo; kweli haipo ndani yake. 5Lakini yeyote anayelishika neno lake, ndani yake upendo wa Mungu umefikia lengo lake kwa kweli. Hivyo ndivyo tunavyojua kwamba tuko ndani yake. 6Yeyote anayedai kwamba anakaa ndani yake anapaswa kuishi kama Yesu alivyoishi.

7Rafiki zangu wapendwa, ninachowaandikia si amri mpya, bali ni ya zamani, ile mliyokuwa nayo tangu mwanzo. Amri hiyo ya zamani ni lile neno mlilosikia. 8Hata hivyo, amri ninayowaandikia ni mpya. Upya wake ni kweli ndani yake na ndani yenu, kwa maana giza linapita, na tayari nuru ya kweli inang’aa. 9Mtu anaweza kusema kwamba yuko katika nuru, lakini kama anamchukia ndugu yake, bado yuko gizani hata sasa. 10Yeyote anayempenda ndugu yake anakaa katika nuru, na ndani yake hamna kitu kinachosababisha kujikwaa. 11Lakini yeyote anayemchukia ndugu yake yuko gizani na anatembea humo, bila kujua anakoelekea, kwa sababu giza limeyapofusha macho yake.

12Wanangu wapendwa, nawaandikia kwa sababu dhambi zenu zimesamehewa kwa ajili ya jina lake. 13Akina baba, nawaandikia kwa sababu mnamjua yule aliyekuwapo tangu mwanzo. Vijana, nawaandikia kwa sababu mmemshinda yule mwovu. 14Watoto, nimewaandikia kwa sababu mnamjua Baba. Akina baba, nimewaandikia kwa sababu mnamjua yule aliyekuwapo tangu mwanzo. Vijana, nimewaandikia kwa sababu mna nguvu, neno la Mungu linakaa ndani yenu, nanyi mmemshinda yule mwovu.

15Msiupende ulimwengu wala vitu vilivyomo ndani yake. Yeyote anayeupenda ulimwengu hana upendo kwa Baba ndani yake. 16Kwa maana kila kitu kilichomo ulimwenguni—tamaa za asili ya kibinadamu, uchu wa macho, na kiburi juu ya mali alizo nazo mtu—hakitokani na Baba, bali kinatokana na ulimwengu. 17Ulimwengu unapita, na tamaa zake pamoja nao; lakini anayetenda mapenzi ya Mungu anakaa milele.

18Watoto, saa ya mwisho imefika. Mlisikia kwamba mpinga-Kristo anakuja, na kwa kweli wapinga-Kristo wengi wameshatokea; ndivyo tunavyojua kwamba saa ya mwisho imefika. 19Walitoka miongoni mwetu, lakini kwa kweli hawakuwa sehemu yetu. Kama wangekuwa sehemu yetu, wangekaa pamoja nasi. Kuondoka kwao kulitokea ili ionekane wazi kwamba hakuna hata mmoja wao aliye sehemu yetu. 20Lakini ninyi, yule Mtakatifu amewapaka mafuta, nanyi nyote mnaijua kweli. 21Sababu ya kuwaandikia si kwamba hamuijui kweli. Ni kwamba mnaijua, na kwamba hakuna uongo wowote unaotokana na kweli. 22Ni nani aliye mwongo, kama si mtu anayekana kwamba Yesu ni Kristo? Mtu huyo ndiye mpinga-Kristo, anayemkana Baba pamoja na Mwana. 23Yeyote anayemkana Mwana hana Baba vilevile; yeyote anayemkiri Mwana ana Baba pia. 24Ninyi, kwa upande wenu, hakikisheni kwamba kile mlichosikia tangu mwanzo kinakaa ndani yenu. Kama kile mlichosikia tangu mwanzo kinakaa ndani yenu, nanyi pia mtakaa ndani ya Mwana na ndani ya Baba. 25Ahadi ambayo yeye mwenyewe ametupa ni hii: uzima wa milele.

26Nimewaandikia mambo haya kuhusu wale wanaotaka kuwapotosha. 27Kwa upande wenu, mlipokea upako kutoka kwake, na upako huo unakaa ndani yenu; hamhitaji mtu yeyote awafundishe. Badala yake, upako wake unawafundisha kuhusu kila kitu, nao ni kweli wala si uongo. Kwa hiyo, kama upako huo ulivyowafundisha, kaeni ndani yake.

28Na sasa, wanangu wapendwa, kaeni ndani yake. Ndipo atakapodhihirishwa, tutaweza kusimama mbele yake kwa ujasiri wakati wa kuja kwake, badala ya kuficha nyuso zetu kwa aibu. 29Kwa kuwa mnajua kwamba yeye ni mwenye haki, mnaweza kuwa na hakika kwamba kila anayetenda yaliyo ya haki amezaliwa naye.