1 Yohana 4

1Rafiki zangu wapendwa, msiamini roho yoyote tu; zipimeni roho ili mjue kama zinatoka kwa Mungu, kwa maana manabii wengi wa uongo wametoka, na sasa wako ulimwenguni. 2Hivi ndivyo mnavyomtambua Roho wa Mungu: kila roho inayomkiri Yesu Kristo kuwa amekuja katika mwili inatoka kwa Mungu, 3na kila roho isiyomkiri Yesu haitoki kwa Mungu. Hiyo ndiyo roho ya mpinga-Kristo; mmesikia kwamba inakuja, na sasa tayari iko ulimwenguni. 4Lakini ninyi, wanangu wapendwa, ni wa Mungu, nanyi tayari mmewashinda, kwa sababu yule aliye ndani yenu ni mkubwa zaidi ya yule aliye ulimwenguni. 5Wao ni wa ulimwengu, kwa hiyo wanayoyasema yanatoka kwa ulimwengu, na ulimwengu unawasikiliza. 6Sisi ni wa Mungu. Yeyote anayemjua Mungu anatusikiliza, na yeyote asiye wa Mungu hatusikilizi. Hivyo ndivyo tunavyomtofautisha Roho wa kweli na roho ya uongo.

7Rafiki zangu wapendwa, tuendelee kupendana, kwa maana chanzo cha upendo ni Mungu; kila anayependa amezaliwa na Mungu na anamjua. 8Mtu asiyependa hajawahi kumjua Mungu, kwa maana Mungu ni upendo. 9Hivi ndivyo upendo wa Mungu ulivyoonekana wazi kati yetu: Mungu amemtuma Mwana wake wa pekee ulimwenguni, ili kupitia yeye tuwe na uzima. 10Upendo unaonekana hapa: si katika sisi kumpenda Mungu, bali katika yeye kutupenda na kumtuma Mwana wake kuwa dhabihu inayofanya upatanisho kwa ajili ya dhambi zetu. 11Rafiki zangu wapendwa, kwa kuwa hivi ndivyo Mungu alivyotupenda, sisi pia tunapaswa kupendana. 12Hakuna aliyewahi kumwona Mungu. Tukipendana, Mungu anakaa ndani yetu, na upendo wake umefikia lengo lake ndani yetu.

13Hivi ndivyo tunavyojua kwamba tunakaa ndani yake na yeye anakaa ndani yetu: ametupa kutoka kwa Roho wake mwenyewe. 14Tumeona kwa macho yetu wenyewe, nasi tunashuhudia kwamba Baba amemtuma Mwana awe Mwokozi wa ulimwengu. 15Mtu yeyote anapokiri kwamba Yesu ni Mwana wa Mungu, Mungu anakaa ndani yake, naye anakaa ndani ya Mungu. 16Sisi wenyewe tumekuja kuujua upendo ambao Mungu anao kwetu, nasi tunauamini. Mungu ni upendo. Yeyote anayekaa katika upendo anakaa ndani ya Mungu, na Mungu anakaa ndani yake. 17Kwa njia hii upendo umefikia lengo lake kati yetu, ili tuwe na ujasiri siku ya hukumu, kwa maana jinsi yeye alivyo, ndivyo tulivyo nasi katika ulimwengu huu. 18Upendo hauna nafasi ya hofu; badala yake, upendo kamili huifukuza hofu, kwa sababu hofu inahusiana na adhabu, na yeyote anayeogopa hajafikia lengo la upendo. 19Tunapenda kwa sababu yeye alitupenda kwanza. 20Mtu akisema, “Ninampenda Mungu,” lakini anamchukia ndugu yake, mtu huyo ni mwongo. Kwa maana yeyote asiyempenda ndugu yake aliyemwona, hawezi kumpenda Mungu ambaye hajamwona. 21Na hii ndiyo amri tuliyopokea kutoka kwake: anayempenda Mungu anapaswa kumpenda ndugu yake pia.