1 Yohana 3

1Fikirini upendo mkuu ambao Baba ametupatia: tunaitwa watoto wa Mungu, na kweli sisi ni watoto wake. Sababu ya ulimwengu kutotujua ni kwamba haukumjua yeye. 2Rafiki zangu wapendwa, sisi ni watoto wa Mungu sasa, na kile tutakachokuwa bado hakijadhihirishwa. Lakini tunajua hili: atakapodhihirishwa, tutakuwa kama yeye, kwa maana tutamwona jinsi yeye alivyo hasa. 3Kila aliye na tumaini hili kwake anajiweka safi, kama yeye alivyo safi.

4Kila anayeendelea kutenda dhambi anafanya uasi pia; dhambi ni uasi. 5Mnajua kwamba yeye alidhihirishwa ili aziondoe dhambi, na ndani yake hamna dhambi. 6Yeyote anayekaa ndani yake haendelei kutenda dhambi; yeyote anayeendelea kutenda dhambi hajamwona wala hajamjua. 7Wanangu wapendwa, msikubali mtu yeyote awapotoshe: mtu anayetenda haki ndiye mwenye haki, kama yeye alivyo mwenye haki. 8Yeyote anayeendelea kutenda dhambi ni wa Ibilisi, kwa sababu Ibilisi amekuwa akitenda dhambi tangu mwanzo, wala hajaacha. Hii ndiyo sababu Mwana wa Mungu alidhihirishwa: ili azibomoe kazi za Ibilisi. 9Yeyote aliyezaliwa na Mungu haendelei kutenda dhambi, kwa maana mbegu ya Mungu inakaa ndani yake; hawezi kuendelea kutenda dhambi, kwa sababu amezaliwa na Mungu. 10Hivi ndivyo inavyojulikana wazi ni nani watoto wa Mungu na ni nani watoto wa Ibilisi: yeyote asiyetenda haki hatoki kwa Mungu, wala yeyote asiyempenda ndugu yake.

11Ujumbe mliousikia tangu mwanzo ni huu: tupendane. 12Tusiwe kama Kaini, aliyekuwa wa yule mwovu, akamuua ndugu yake. Na kwa nini alimuua? Ni kwa sababu yeye mwenyewe alitenda maovu, na ndugu yake alitenda yaliyo ya haki. 13Ndugu zangu, msione ajabu ulimwengu ukiwachukia. 14Tunajua kwamba tumetoka katika mauti tukaingia katika uzima, kwa sababu tunawapenda ndugu zetu. Yeyote asiyependa anakaa katika mauti. 15Yeyote anayemchukia ndugu yake ni muuaji, nanyi mnajua kwamba uzima wa milele haukai ndani ya muuaji yeyote. 16Hivi ndivyo tulivyokuja kujua upendo ni nini: yeye aliyatoa maisha yake kwa ajili yetu. Nasi pia tuna deni kwa ndugu zetu la kuyatoa maisha yetu kwa ajili yao. 17Tuseme mtu ana mali ya kutosha ya ulimwengu huu, akamwona ndugu yake mwenye shida, lakini akamfungia moyo wake. Upendo wa Mungu unawezaje kukaa ndani ya mtu wa namna hiyo? 18Wanangu wapendwa, tusipende kwa yale tunayosema au kwa ndimi zetu tu, bali kwa yale tunayotenda na katika kweli. 19Hivi ndivyo tutakavyojua kwamba tunatoka katika kweli, na jinsi tutakavyoituliza mioyo yetu mbele yake 20kila mioyo yetu inapotuhukumu: Mungu ni mkuu zaidi ya mioyo yetu, naye anajua kila kitu. 21Rafiki zangu wapendwa, ikiwa mioyo yetu haituhukumu, tunaweza kumkaribia Mungu kwa ujasiri, 22na chochote tunachoomba tunakipokea kutoka kwake, kwa kuwa tunazishika amri zake na kutenda yale yanayompendeza. 23Hiki ndicho Mungu anachoamuru: kwamba tuliamini jina la Mwana wake Yesu Kristo, na kwamba tupendane, kwa kufuata amri aliyotupa. 24Wale wanaozishika amri zake wanakaa ndani ya Mungu, na Mungu anakaa ndani yao. Tunaweza kuwa na hakika kwamba yeye anakaa ndani yetu kwa sababu ya Roho ambaye ametupa.