Weedduu 1

¹Weedduu Weeddotaa Solomoon.

²Inni dhungoo afaan isaatiin na haa dhungatu; jaalalli kee daadhii wayinii caalaatii.

³Urgaan shittoo keetii namatti tola; maqaan kee akkuma shittoo dhangalaafamee ti. Kanaafuu dubarran si jaallatu!

⁴Na fudhadhuu deemi; si duukaa fiignaa! Mootichi diinqa isaatti ol na galfate. Nu sitti gammannee ililchina; jaalala kees daadhii wayinii caalaa jajanna. Si jaallachuun isaanii akkam sirrii dha!

⁵Intallan Yerusaalem, ani akkuma dunkaana Qeedaar, akkuma golgaa dunkaana Solomoonis gurraattii dha; garuu bareedduu dha.

⁶Sababii ani gurraattii taʼeef, ija babaaftee na hin ilaalin; aduutu na gurraachesseetii. Ilmaan haadha koo natti aaranii akka ani iddoo dhaabaa wayinii eegu na taasisan; ani garuu iddoo dhaabaa wayinii koo hin eegganne.

⁷Yaa isa ani si jaalladhu, iddoo bushaayee kee tikfattuu fi iddoo itti guyyaa saafaa hoolota kee boqochiifattu natti himi. Ani maaliifan akka dubartii fuula ishee haguugattee bushaayee michoota keetii bira asii fi achi joortu tokkoo taʼa?

⁸Yaa dubartii dubartoota hunda caalaa bareeddu, ati yoo beekuu baatte hoolota duukaa buʼi; ilmoolee reʼoota keetiis dunkaana tiksootaa bira tikfadhu.

⁹Yaa jaalallee ko, ani akka farda dhalaa fardeen gaarii Faraʼoon harkisan keessaa tokkootti sin ilaala.

¹⁰Maddiin kee amartii gurraatiin, mormii kees dirata warqeetiin miidhagfameera.

¹¹Nu warqee gurraa meetiidhaan wal make siif tolchina.

¹²Utuma mootichi maaddiitti dhiʼaatee jiruu shittoon koo urgaa isaa kenne.

¹³Michuun koo anaaf korojoo qumbii ti; inni guntuta koo gidduu boqota.

¹⁴Michuun koo anaaf hurbuu daraaraa heennaa kan iddoo dhaabaa wayinii Een Gaadiitii dhufee dha.

¹⁵Yaa jaalallee ko, ati akkam bareedda! Dinqii akkam bareedda! Iji kee gugee fakkaata.

¹⁶Yaa michuu ko, ati akkam miidhagda! Dinqii akkam namatti tolta! Margi lalisaan siree keenya.

¹⁷Dareersumaan mana keenyaa birbirsa; dagaleen isaa immoo gaattiraa dha.