Masese 8

¹Boni, Bwanya azali kobelela te? Mayele azali koyokisa mongongo na ye te?

²Atelemi na songe ya bangomba, na pembeni ya nzela, na bisika oyo banzela ekutana,

³azali koganga pene ya bikuke, na ekotelo ya engumba:

⁴« Bato, nazali koganga makasi epai na bino, nazali nde koloba na bino bato!

⁵Bino bato oyo bozanga mayele, bokoma na bososoli! Bino bazoba, bokoma mayele!

⁶Boyoka, pamba te nazali na makambo ya motuya ya koyebisa bino, nafungoli monoko na ngai mpo na koloba makambo ya sembo.

⁷Pamba te monoko na ngai ebimisaka maloba ya solo, mpe bibebu na ngai eyinaka mabe.

⁸Maloba nyonso oyo ebimaka na monoko na ngai ezali sembo, ezalaka na likambo moko te ya lokuta to ya mabe;

⁹nyonso ezali pole mpo na moto ya mayele, mpe sembo mpo na bato oyo bazali na bososoli.

¹⁰Boluka mateya na ngai kasi palata te, boyebi kasi wolo te oyo eleki peto,

¹¹pamba te bwanya ezali na motuya koleka mayaka ya kitoko, bongo eloko moko te ya motuya ekokani na yango.

¹²Ngai, Bwanya, navandaka elongo na kokanisa, boye nayebi kokundola mayele mpe bososoli.

¹³Kotosa Yawe ezali koyina mabe. Nayinaka lolendo, lofundu, nzela ya masumu mpe monoko ya lokuta.

¹⁴Toli mpe bososoli ezali ya ngai, ngai nde mayele mpe makasi.

¹⁵Ezali na nzela na ngai nde bakonzi batambolisaka mokili, mpe bakambi basalaka mibeko ya sembo;

¹⁶ezali na nzela na ngai nde bakambi, bankumu mpe basambisi nyonso ya mokili bayangelaka.

¹⁷Nalingaka bato oyo balingaka ngai, mpe bato oyo balukaka ngai bamonaka ngai.

¹⁸Bozwi mpe lokumu, bomengo oyo ewumelaka mpe bosembo etambolaka elongo na ngai.

¹⁹Mbuma na ngai ezali kitoko koleka wolo, ezala wolo ya peto, mpe mbuma oyo nabotaka eleki palata ya kitoko.

²⁰Natambolaka na nzela ya bosembo, mpe nasalelaka banzela oyo ememaka na boyengebene,

²¹mpo na kopesa libula epai ya bato oyo balingaka ngai mpe mpo na kotondisa bibombelo na bango.

²²Yawe asalaki ngai liboso ete asala nyonso, liboso ya misala na Ye nyonso ya kala;

²³aponaki ngai liboso ete mokili ezala, wuta na ebandeli penza, wuta na tango oyo biloko nyonso ya mokili ezalaki nanu te.

²⁴Nabotamaki tango mayi ya bozindo ezalaki nanu te, tango miluka ebimisaki nanu mayi na yango te,

²⁵liboso ete bangomba ya milayi mpe bangomba ya mikuse ezala na bisika na yango,

²⁶tango amisalelaki nanu te, ezala mabele to bilanga to mpe putulu ya mokili.

²⁷Nazalaki wana tango atandaki likolo na esika na yango, mpe tango akataki mondelo ya etando monene ya mayi ya bozindo,

²⁸tango atiaki mapata na likolo mpe abimisaki mayi wuta na bitima,

²⁹tango akatelaki ebale monene mondelo mpo ete mayi ezindisa mokili na Ye te, tango atiaki miboko ya mabele;

³⁰nazalaki pembeni na Ye lokola mosungi, nazalaki kosepelisa ye tango nyonso, mpe nazalaki tango nyonso na esengo liboso na Ye;

³¹nazalaki kosepela kati na mokili na Ye mpe nazalaki na esengo kati na bato.

³²Sik’oyo, mwana na ngai, yoka ngai: Esengo na bato oyo babatelaka banzela na ngai!

³³Boyoka mateya na ngai mpe bokokoma bato ya bwanya, bomeka kobwaka yango te!

³⁴Esengo na moto oyo ayokelaka ngai, oyo asenzelaka na ekuke na ngai mokolo na mokolo, mpe akengelaka na ekotelo na ngai!

³⁵Pamba te moto oyo amoni ngai amoni bomoi mpe azwi ngolu na miso ya Yawe.

³⁶Kasi moto oyo atosaka ngai te amisalaka mabe ye moko: moto nyonso oyo ayinaka ngai alingaka kufa. »