Masese 2

¹Mwana na ngai, soki ondimi maloba na ngai mpe obateli kati na motema na yo mibeko na ngai;

²soki opesi litoyi na yo na maloba ya bwanya mpe okabi motema na yo na makambo ya mayele;

³soki obeleli mayele mpe ogangi epai ya bososoli;

⁴soki oluki yango penza ndenge balukaka palata to bomengo oyo ebombama,

⁵okososola solo soki kotosa Yawe elakisi nini mpe okozwa boyebi ya Nzambe.

⁶Pamba te Yawe nde apesaka bwanya, mpe maloba ya monoko na Ye epesaka mayele mpe bososoli.

⁷Abongiselaka bato ya sembo elonga mpe azali nguba ya bato oyo batambolaka na bosembo.

⁸Pamba te abatelaka bayengebene mpe nzela ya bato oyo batosaka Ye.

⁹Boye, okososola likambo nini ezali solo, alima, sembo: nzela nyonso oyo ememaka na bolamu.

¹⁰Pamba te bwanya ekokota kati na motema na yo mpe boyebi ekosepelisa molimo na yo.

¹¹Bososoli ekobatela yo, mpe mayele ekobomba yo

¹²mpo na kobikisa yo na nzela mabe, na moto oyo alobaka makambo ezanga tina,

¹³na bato oyo batikaka nzela ya sembo mpo na kolanda nzela ya molili,

¹⁴na bato oyo basepelaka kosala mabe, na bato oyo bazalaka na esengo ya kokota na bozindo ya mabe,

¹⁵na bato oyo nzela na bango etengama-tengama mpe etamboli na bango etonda na mobulu.

¹⁶Bwanya ekobikisa yo lisusu liboso ya mwasi mopaya, liboso ya mwasi oyo atonda na maloba ya sukali,

¹⁷oyo akima mobali na ye ya bolenge mpe abosana boyokani oyo asalaki elongo na Nzambe na ye;

¹⁸pamba te ndako na ye ememaka na kufa, mpe nzela na ye ememaka na mboka ya bakufi.

¹⁹Moto moko te oyo akotaka epai na ye azongaka mpe amonaka lisusu nzela ya bomoi.

²⁰Boye, okotambola na nzela ya bato malamu mpe okolanda nzela ya bato ya sembo.

²¹Pamba te bato ya sembo bakovanda na mokili, mpe bato oyo bazangi pamela bakotikala kati na yango;

²²kasi bato mabe bakokufa na mokili mpe bakolongola bango kati na mokili ya bato ya songisongi.