Masese 6

¹Mwana na ngai, soki ondimi niongo ya moninga na yo, soki obeti tolo mpo na kondima niongo ya mopaya,

²omikangi nde singa na maloba na yo, omikangi nde na motambo ya maloba ya monoko na yo.

³Boye, mwana na ngai, sala makambo oyo mpo ete omikangola, pamba te omikabaki na maboko ya moninga na yo; kende komikitisa liboso na ye mpe tingama na ye,

⁴kotika te ete miso na yo elala pongi to enimba;

⁵mikangola na motambo lokola mboloko na maboko ya mobomi banyama ya zamba, mpe lokola ndeke na motambo ya mokangi bandeke.

⁶Yo moto ya goyigoyi, kende epai ya furmi, tala malamu ezaleli na yango mpe okozwa bwanya!

⁷Yango ezalaka na mokambi te, mokengeli te to mokonzi te;

⁸ebongisaka bilei na yango na tango ya moyi makasi, ebombaka yango na tango ya kobuka mbuma.

⁹Yo moto ya goyigoyi, okolala pongi kino tango nini? Kino tango nini okolamuka na pongi na yo?

¹⁰Mwa pongi moke, mwa kopema moke, mwa kokanga maboko moke mpo na kolala

¹¹mpe bobola ekoyela yo na pwasa lokola moleki nzela, mpe pasi ekoyela yo lokola moyibi.

¹²Moto oyo atambolaka na lokuta na monoko azali moto ya Beliali, moto mabe:

¹³Abetaka-betaka miso, apesaka bilembo na makolo na ye mpe alobaka na nzela ya bilembo ya misapi;

¹⁴azalaka na makanisi mabe kati na motema na ye, asalaka tango nyonso mabongisi ya mabe mpe alukaka kaka tango nyonso makelele.

¹⁵Yango wana, pasi ekoyela ye na pwasa, akobukana mbala moko, mpe kisi ya kobikisa ye ekozala te.

¹⁶Yawe ayinaka makambo wana motoba; mpe makambo oyo sambo ezali mabe penza na miso na Ye:

¹⁷Kodongola, lolemo ya lokuta, maboko oyo ebomaka moto oyo asali mabe te,

¹⁸motema oyo ekanisaka mabongisi ya mabe, makolo oyo epotaka mbangu na mabe,

¹⁹motatoli mabe oyo alobaka lokuta mpe moto oyo alukaka makelele kati na bandeko.

²⁰Mwana na ngai, batela mibeko ya tata na yo mpe kosundola te mateya ya mama na yo.

²¹Kanga yango tango nyonso na motema na yo, lata yango na kingo na yo.

²²Pamba te ekolakisa yo nzela tango okokende na mobembo, ekobatela yo tango okolala pongi mpe ekosolola na yo tango okolamuka.

²³Mibeko ezali mwinda, mateya ezali pole, makebisi mpe pamela ezali nzela ya bomoi,

²⁴mpo na kobatela yo mosika ya mwasi ya ndumba, mosika ya lokuta ya lolemo ya mwasi ya mopaya.

²⁵Kotika te ete motema na yo elula kitoko na ye, mpe miso na ye ekweyisa yo.

²⁶Pamba te likolo ya mwasi ya ndumba, okoki kobungisa ezala eteni na yo ya lipa, mpe mwasi ya libala akoki kobebisa bomoi ya motuya.

²⁷Boni, moto akoki solo kozika moto, bongo bilamba na ye ezika te?

²⁸Moto akoki solo kotambola na likolo ya makala ya moto, bongo makolo na ye ezika te?

²⁹Boye, moto nyonso oyo akosangisa nzoto na mwasi ya ndeko na ye akozanga te kozwa etumbu.

³⁰Kotiola moyibi te soki ayibi mpo ete azali na nzala mpe azangi eloko ya kolia.

³¹Kasi soki bakangi ye, akozongisa mbala sambo, akopesa biloko nyonso ya ndako na ye.

³²Mobali oyo asalaka ekobo na mwasi ya moninga azali lokola moto oyo azangi mayele; kosala ekobo ya boye ezali nde komiboma;

³³akobuka lokola mbuma: minyoko mpe kosambwa; bongo soni na ye ekosila te.

³⁴Pamba te zuwa epelisaka kanda makasi kati na mobali, mpe akozala na mawa te na mokolo oyo akozongisa mabe na mabe;

³⁵akotikala kondima ata lifuti moko te mpo ete akoka kolimbisa, mpe akoboya yango ata soki babakisi bakado.