Yobo 39

¹Oyebi tango nini bantaba ya ngomba ebotaka? Osila komona ndenge mboloko ebotaka?

²Osila kotanga basanza oyo ewumelaka na zemi? Oyebi tango oyo ebotaka?

³Ekogumbama, ekobota bana na yango mpe ekolongwa na pasi na yango ya kobota.

⁴Bana na yango ekozwa makasi, ekokola na libanda, ekokende mosika mpe ekozonga lisusu te.

⁵Nani akangoli ane ya zamba? Nani apesi yango bonsomi?

⁶Ngai nde napesi yango esobe lokola ndako, mpe mabele ya mungwa lokola esika ya kovanda.

⁷Esekaka makelele ya bingumba mpe eyokaka te mongongo ya motambolisi ya mpunda.

⁸Etambolaka na ngomba mpo na koluka bilei mpe elukaka na bokebi matiti nyonso ya mobesu.

⁹Mpakasa ekoki kondima kosalela yo? Ekoki kolekisa butu na elielo na yo ya banyama?

¹⁰Okoki kokanga mpakasa na singa ya ebende oyo ebalolaka mabele? Ekoki kolanda yo mpo na kotondisa mabwaku na mabele?

¹¹Okotia solo elikya na yo kati na yango, mpo ete makasi na yango ezali monene? Okotikela yango mosala na yo?

¹²Okotiela yango solo motema mpo na komemela yo bambuma mpe kosangisa yango na etutelo na yo?

¹³Mapapu ya maligbanga efungwamaka na esengo nyonso, kasi, boni, lipapu mpe nsala na yango ekokani na oyo ya nkongi?

¹⁴Maligbanga ebwakaka maki na yango na mabele mpe etikaka yango ete ezwa moto ya mabele,

¹⁵kasi ebosanaka ete lokolo ekoki kopanza yango mpe banyama ya zamba ekoki konyata-nyata yango.

¹⁶Enyokolaka bana na yango makasi lokola nde ezali bana na yango te, emonaka na yango motema pasi te lokola nde esali mosala ya mpunda,

¹⁷pamba te Nzambe apimeli yango bwanya mpe apesi yango mayele te.

¹⁸Nzokande soki etelemi mpe ebandi kopota mbangu, ekoseka ata mpunda mpe motambolisi na yango.

¹⁹Boni, yo nde moto opesa mpunda makasi mpe olatisa kingo na yango pwale ya milayi?

²⁰Yo moto opumbwisaka yango lokola libanki? Lolendo ya mongongo kitoko na yango epesaka somo.

²¹Mpunda enyataka na makasi nyonso maboke ya mabele, esepelaka na makasi na yango mpe ekendaka liboso ya bibundeli.

²²Eyokaka somo te, ebangaka eloko moko te, ezongaka sima te liboso ya mopanga,

²³tango saki ya mbanzi eninganaka likolo na yango elongo na likonga oyo ezali kopela moto mpe mopanga.

²⁴Epumbwaka na kanda mpe epanzaka mabele, evandaka kimia te soki kelelo ebeti.

²⁵Soki kelelo ebeti, egangaka: ‹ Ah! › Na mosika, eyokaka solo ya bitumba, koganga ya bakambi ya basoda mpe makelele ya bitumba.

²⁶Boni, ezali na mayele na yo nde kombekombe epumbwaka mpe etandaka mapapu na yango na ngambo ya sude?

²⁷Na mitindo na yo nde mpongo emataka likolo mpe esalaka zala na yango na likolo?

²⁸Evandaka mpe etongaka ndako kati na mabanga, na esika ya kaka, na songe ya libanga.

²⁹Wuta na likolo, emonaka nyama ya kolia, miso na yango emonaka na mosika.

³⁰Bana na yango emelaka makila. Esika ebembe ezali, mpongo ezali wana. »