Yobo 20

¹Tsofari, moto ya Naama, azwaki maloba mpe alobaki:

²« Makanisi na ngai ezali kotinda ngai ete nayanola, nakoki kovanda nye te, pamba te motema na ngai ekomi likolo-likolo.

³Nazali koyoka maloba mabe, maloba oyo eyokisi ngai soni! Kasi mayele na ngai elakisi ngai maloba ya kozongisa.

⁴Solo, oyebi malamu ete wuta kala, wuta tango batia moto na likolo ya mabele,

⁵elonga ya bato mabe ezalaka ya tango moke, mpe esengo ya moto oyo azangi boyengebene ewumelaka kaka mwa tango moke.

⁶Ata molayi na ye emati kino likolo mpe moto na ye etuti mapata,

⁷akobebisama libela lokola nyei na ye, mpe bato oyo bakomona ye bakoloba: ‹ Azali wapi? ›

⁸Abungaka lokola ndoto, mpe bakomona ye lisusu te, alimwaka lokola na ndoto ya butu.

⁹Liso oyo ezalaki kotala ye ekomona ye lisusu te, esika oyo azalaki kovanda ekomona ye lisusu te,

¹⁰bana na ye basengeli kofuta lomande epai ya babola, maboko na ye ekozongisa bozwi oyo abotolaki,

¹¹mikuwa na ye oyo ezalaki makasi na bolenge ekolala elongo na ye kati na putulu.

¹²Soki mabe ezali sukali na monoko na ye mpe abombi yango na se ya lolemo na ye,

¹³soki ameki elengi na yango mpe atiki yango te, soki abombi yango na se ya minu na ye,

¹⁴bilei na ye ekobongwana kati na libumu na ye, ekokoma lokola ngenge ya nyoka kati na ye.

¹⁵Amelaki na pamba bozwi ebele, asengeli kosanza yango; Nzambe akofutisa ye yango.

¹⁶Akofiba ngenge ya nyoka, lolemo ya etupa ekoboma ye.

¹⁷Akomona lisusu te mayi mike, miluka, bibale, mayi oyo etiolaka makasi elongo na mafuta ya nzoyi mpe miliki;

¹⁸akozongisa bambuma ya mosala na ye mobimba, akomela ata moko te, akotikala kosepela te na litomba oyo azwaki na mombongo na ye.

¹⁹Pamba te anyokolaki babola mpe atikaki bango lokola bato bazangela, abotolaki ndako ya bato na esika ya kotonga ndako na ye moko.

²⁰Solo, lokoso na ye ya kozwa mingi ekosila te, akoki komibikisa te na nzela ya bomengo na ye.

²¹Ayebaki te kopekisa lokoso ya libumu na ye, yango wana bomengo na ye mpe ekowumela te.

²²Wana azali kati na bomengo, pasi ekokomela ye, kilo nyonso ya pasi ekokweyela ye.

²³Wana azali kotondisa libumu na ye, Nzambe akosopela ye kanda makasi na Ye, mpe ekonokela ye lokola bilei.

²⁴Ata akimi liboso ya ebundeli ya ebende, mbanzi ya bronze ekotobola ye;

²⁵soki abimisi songe ya mbanzi yango na libale na ye elongo na makila ya mbuma-mbuma, somo ekoyela ye.

²⁶Molili makasi ezali kozela libula na ye, moto makasi oyo moto apelisi te ekozikisa ye elongo na biloko oyo ekotikala kati na ndako na ye.

²⁷Likolo ekobimisa polele mabe na ye, mabele ekotelemela ye;

²⁸mayi ekomema ndako na ye mpe biloko nyonso ya ndako na ye, na mokolo ya kanda ya Nzambe.

²⁹Yango nde lifuti oyo Nzambe abongisi mpo na moto mabe, libula oyo Nzambe alaki ye. »