Yobo 15

¹Elifazi, moto ya Temani, azwaki maloba mpe alobaki:

²« Boni, moto ya bwanya akopesaka solo eyano na maloba ya pamba boye, maloba oyo ezanga ata tina, to alingaka kotondisa libumu na ye na mopepe ya moto oyo ewutaka na Este?

³Akoki solo komilobela na maloba ezanga ata tina? Akoki solo kosalela maloba milayi oyo ezali ata na motuya te?

⁴Yo ozali penza kobebisa lokumu ya Nzambe okomi koboya lokumu liboso ya Nzambe.

⁵Lisumu na yo ezali kokamba monoko na yo, ozwi elobeli ya bakosi.

⁶Monoko na yo moko nde ezali komemela yo etumbu, kasi monoko na ngai te; bibebu na yo moko nde ezali kofunda yo.

⁷Yo nde moto ya liboso oyo obotama kati na bato? Omona moyi liboso ya bangomba mikuse?

⁸Osila koyoka makambo oyo elobamaka kati na Likita ya Nzambe? Bwanya ezalaka kaka epai na yo moko?

⁹Makambo nini oyebi, oyo biso toyebi te? Boyebi nini ozali na yango, oyo biso tozali na yango te?

¹⁰Na ngambo na biso, ezali na bato ya suki pembe, bampaka, bato oyo baleki tata na yo na mibu ya mbotama.

¹¹Kobondisama ya Nzambe mpe maloba ya kimia oyo bazali koloba mpo na yo, ekoki te mpo na yo?

¹²Mpo na nini motema na yo ezali kopengwisa yo, mpe miso na yo ezali kobeta-beta?

¹³Mpo ete obwakela Nzambe kanda na yo mpe obimisa makambo ya boye na monoko na yo?

¹⁴Moto azali nani mpo ete azala peto? Ye oyo abotami na mwasi azali nani mpo ete azala sembo?

¹⁵Soki Nkolo azali kondimela basantu na Ye te, soki kutu likolo ezali peto te na miso na Ye,

¹⁶ekozala boni mpo na moto mabe, moto oyo abeba, oyo asalaka mabe lokola azali komela mayi?

¹⁷Yoka ngai, mpe nakolimbolela yo! Tika ete nayebisa yo makambo oyo ngai namona,

¹⁸makambo oyo bato ya bwanya balobaki, na kobomba ata eloko moko te kati na makambo oyo bazwaki epai ya batata na bango.

¹⁹Apesaki mokili epai na bango kaka tango ata mopaya moko te alekaki kati na bango.

²⁰Na bomoi na ye mobimba, na mibu oyo bakata mpo na bomoi na ye, moto mabe anyokwamaka.

²¹Lokito ya somo etondisaka matoyi na ye, bato ya mobulu babimelaka ye ata na tango ya kimia.

²²Azalaka na elikya te ya kobima na molili, mpe mopanga ezelaka ye.

²³Ayengaka-yengaka mpo na koluka lipa, kasi akozwela yango wapi? Ayebaka ete mokolo ya molili ezelaka ye.

²⁴Pasi mpe mawa ebangisaka ye, ekomelaka ye lokola mokonzi oyo amibongisi mpo na bitumba,

²⁵mpo ete asembolaka loboko na ye mpo na kobundisa Nzambe, atelemelaka Nkolo-Na-Nguya-Nyonso,

²⁶akimaka epai na Ye, moto etala na se, amibombaka na sima ya banguba minene.

²⁷Elongi na ye ekotonda mafuta, loketo na ye ekokoma monene;

²⁸akovanda na engumba ebeba, kati na bandako oyo bato bakima, bandako oyo ekoma pene ya kokweya;

²⁹akotikala kokoma mozwi te, pamba te bozwi na ye ekowumela te, bomengo na ye ekopanzana te kati na mokili mobimba;

³⁰akokoka kokima molili te, moto ekokawusa mandalala na ye mpe akokima ata pema na ye moko.

³¹Tika ete atia elikya na ye na lokuta te, pamba te akoyokisama soni mpe akozwa libebi lokola lifuti.

³²Ekokokisama liboso ete akufa, ndenge lindalala ekawukaka mpo na kozanga mayi na yango

³³to lokola nzete ya vino oyo ekweyisi bambuma na yango, wana ezali nanu mobesu to lokola nzete ya olive oyo ekweyisi fololo na yango.

³⁴Solo, libota ya moto mabe ekofuluka te, mpe moto ekozikisa ndako na ye mpo na mabe na ye moko.

³⁵Pamba te moto nyonso oyo azalaka na makanisi mabe kati na ye abotaka kaka pasi; mabe oyo ekolaka kati na ye ememelaka ye moko libebi. »