Ruthu 4

1Wakati huo Boazi alikuwa amepanda kwenye lango la mji, akaketi huko. Mara yule mkombozi wa jamaa ambaye Boazi alikuwa amemtaja akapita. Boazi akamwita, “Njoo hapa uketi, ndugu fulani.” Basi mtu huyo akaja, akaketi. 2Kisha Boazi alichukua watu kumi kati ya wazee wa mji, akasema, “Tafadhali ketini hapa.” Nao wakaketi. 3Kisha alimwambia yule mkombozi wa jamaa, “Naomi, aliyerudi kutoka nchi ya Moabu, anauza kipande cha shamba kilichokuwa cha jamaa yetu Elimeleki. 4Nilidhani nikujulishe na kukuambia, ‘Inunue mbele ya hawa walioketi hapa na mbele ya wazee wa watu wangu.’ Kama uko tayari kuikomboa, ikomboe. Kama sivyo, niambie ili nijue. Kwa maana hakuna mwenye haki ya kuikomboa ila wewe, nami ni wa pili baada yako.” Akasema, “Nitaikomboa.” 5Kisha Boazi alisema, “Siku utakapolinunua shamba kutoka kwa Naomi, na kutoka kwa Ruthu Mmoabu, mjane wa marehemu, unamtwaa Ruthu pia, ili jina la marehemu lidumu juu ya urithi wake.” 6Yule mkombozi wa jamaa alijibu, “Basi siwezi kuikomboa kwa ajili yangu, la sivyo ningeharibu urithi wangu mwenyewe. Ichukue wewe mwenyewe haki yangu ya ukombozi, kwa maana mimi siwezi kuikomboa.” 7Zamani katika Israeli, hivi ndivyo ukombozi na kubadilishana vilivyothibitishwa: mtu mmoja alivua kiatu chake akampa mwenzake. Hivyo ndivyo makubaliano yalivyoshuhudiwa katika Israeli. 8Basi yule mkombozi wa jamaa alipomwambia Boazi, “Inunue wewe,” alivua kiatu chake. 9Kisha Boazi aliwaambia wazee na watu wote, “Leo ninyi ni mashahidi kwamba ninanunua kutoka kwa Naomi kila kitu kilichokuwa cha Elimeleki na kila kitu kilichokuwa cha Kilioni na Maloni. 10Pia ninamtwaa Ruthu Mmoabu, mjane wa Maloni, kuwa mke wangu, ili jina la marehemu lidumu juu ya urithi wake, lisikatiliwe mbali kati ya jamaa zake wala katika lango la mji wake. Leo ninyi ni mashahidi.” 11Watu wote waliokuwa langoni na wazee walijibu, “Sisi ni mashahidi. BWANA na amfanye mwanamke huyu anayeingia nyumbani mwako kama Raheli na Lea, wanawake wawili walioijenga jamaa ya Israeli. Ufanikiwe katika Efrata na kuwa na sifa huko Bethlehemu. 12Kupitia watoto ambao BWANA atakupa kwa msichana huyu, jamaa yako na iwe kama jamaa ya Peresi, mwana ambaye Tamari alimzalia Yuda.” 13Basi Boazi alimchukua Ruthu nyumbani, naye akawa mke wake. Alilala naye, naye BWANA akamjalia kupata mimba, akazaa mwana. 14Wanawake walimwambia Naomi, “Asifiwe BWANA, ambaye leo hajakuacha bila mkombozi wa jamaa! Jina lake na liwe maarufu katika Israeli. 15Atakuhuisha na kukutunza utakapokuwa mzee. Kwa maana mkweo, anayekupenda na aliye wa thamani kwako kuliko wana saba, ndiye aliyemzaa.” 16Kisha Naomi alimchukua mtoto, akamweka mapajani pake, akamlea. 17Wanawake walioishi jirani walimpa jina. Walisema, “Naomi amepata mwana!” Wakamwita Obedi. Yeye akawa baba wa Yese, baba wa Daudi.

18Hawa ndio wazao wa Peresi. Peresi alimzaa Hesroni. 19Hesroni alimzaa Ramu, na Ramu akamzaa Aminadabu. 20Aminadabu alimzaa Nashoni, na Nashoni akamzaa Salmoni. 21Salmoni alimzaa Boazi, na Boazi akamzaa Obedi. 22Obedi alimzaa Yese, na Yese akamzaa Daudi.