Ruthu 2

1Naomi alikuwa na jamaa wa upande wa mumewe, mtu mwenye mali na heshima, wa ukoo wa Elimeleki. Jina lake lilikuwa Boazi. 2Ruthu Mmoabu alimwambia Naomi, “Niache niende mashambani niokote masazo ya masuke nyuma ya yeyote atakayenitazama kwa kibali.” Naomi akamjibu, “Nenda, binti yangu.” 3Basi aliondoka, akafika shambani, akaokota masazo nyuma ya wavunaji. Ikatukia kwamba alifika katika sehemu ya shamba iliyokuwa ya Boazi, aliyekuwa wa ukoo wa Elimeleki. 4Wakati huo huo Boazi alifika kutoka Bethlehemu. Aliwasalimu wavunaji, “BWANA awe pamoja nanyi!” Nao wakamjibu, “BWANA akubariki!” 5Boazi alimwuliza mtumishi wake aliyekuwa msimamizi wa wavunaji, “Msichana huyu ni wa nani?” 6Mtumishi aliyekuwa msimamizi wa wavunaji alijibu, “Yeye ni msichana Mmoabu, yule aliyerudi pamoja na Naomi kutoka nchi ya Moabu. 7Alisema, ‘Tafadhali niache niokote masazo na kukusanya kati ya miganda nyuma ya wavunaji.’ Kwa hiyo alikuja, naye amekuwa kazini tangu asubuhi na mapema mpaka sasa, ila tu alipumzika kidogo kibandani.” 8Kisha Boazi alimwambia Ruthu, “Nisikilize, binti yangu. Usiende kuokota masazo katika shamba lingine lolote, wala usiondoke katika shamba hili. Kaa hapa karibu na wasichana wangu. 9Yaangalie shamba wanalovuna, uwafuate wale wanawake. Nimewaamuru vijana wasikuguse. Nawe ukiona kiu, nenda kwenye mitungi unywe maji yaliyotekwa na vijana.” 10Ruthu alianguka kifudifudi, akainama mpaka chini. Akamwambia, “Kwa nini nimepata kibali kama hiki kwako, hata unanijali, nami ni mgeni?” 11Boazi alimjibu, “Nimesikia habari yote ya yale uliyomtendea mama mkwe wako tangu mumeo alipokufa: jinsi ulivyomwacha baba yako na mama yako na nchi uliyozaliwa, ukaja kwa watu ambao hukuwahi kuwajua kabla. 12BWANA na akulipe kwa yale uliyoyatenda. Upate mshahara wako kamili kutoka kwa BWANA, Mungu wa Israeli, ambaye umekuja kukimbilia chini ya mabawa yake.” 13Akasema, “Niendelee kupata kibali machoni pako, bwana wangu. Umenifariji na kusema kwa upole na mtumishi wako, ingawa mimi si hata mmoja wa wajakazi wako.” 14Wakati wa chakula ulipofika, Boazi alimwambia, “Njoo hapa ujipatie mkate. Chovya kipande chako katika divai chachu.” Basi aliketi kando ya wavunaji, naye akampa bisi. Alikula akashiba, na bado akabakiza. 15Alipoinuka kwenda kuokota masazo, Boazi aliwaagiza vijana wake: “Mwacheni aokote hata kati ya miganda, wala msimwaibishe. 16Na hata mvute masuke kadhaa kutoka kwenye mafungu kwa ajili yake, myaache ili ayaokote. Msimkaripie.” 17Basi Ruthu aliokota masazo shambani mpaka jioni. Kisha alipiga alichokiokota, nacho kikawa karibu lita 22 za shayiri. 18Alikibeba, akaingia mjini, na mama mkwe wake akaona kiasi alichokiokota. Ruthu pia alitoa chakula alichobakiza baada ya kula akashiba, akampa. 19Mama mkwe wake alimwuliza, “Umeokota masazo wapi leo? Umefanya kazi wapi? Abarikiwe mtu aliyekujali!” Basi Ruthu alimweleza mama mkwe wake habari za mtu aliyefanya kazi kwake. Akasema, “Mtu niliyefanya kazi kwake leo anaitwa Boazi.” 20Naomi alimwambia mkwe wake, “BWANA ambariki! BWANA hajaacha kuwaonyesha walio hai na waliokufa upendo wake usiokoma.” Naomi akaendelea, “Mtu huyo ni jamaa yetu wa karibu. Yeye ni mmoja wa wakombozi wa jamaa yetu.” 21Kisha Ruthu Mmoabu alisema, “Hata aliniambia, ‘Kaa karibu na wafanyakazi wangu mpaka watakapomaliza mavuno yangu yote.’” 22Naomi alimwambia Ruthu mkwe wake, “Ni bora, binti yangu, utoke pamoja na wasichana wake. Katika shamba la mtu mwingine ungeweza kudhuriwa.” 23Basi Ruthu alikaa karibu na wasichana wa Boazi, akaokota masazo mpaka mavuno ya shayiri na ya ngano yalipokwisha. Naye aliendelea kuishi pamoja na mama mkwe wake.