Ruthu 3

1Naomi, mama mkwe wake, alimwambia, “Binti yangu, je, si wakati wangu kukutafutia makao yenye utulivu, ambapo maisha yako yatakuwa mema? 2Sasa Boazi, ambaye umekuwa ukifanya kazi pamoja na wasichana wake, ni jamaa yetu, sivyo? Usiku huu anapepeta shayiri katika uwanja wa kupuria. 3Basi oga, jipake mafuta yenye manukato, vaa vizuri, ushuke uwanjani pa kupuria. Lakini usionekane na mtu huyo mpaka atakapomaliza kula na kunywa. 4Atakapolala, pakumbuke mahali alipolala. Kisha umwendee, ufunue miguu yake, ulale hapo, naye atakuambia unachopaswa kufanya.” 5Ruthu alimjibu, “Nitafanya kila kitu unachoniambia.” 6Basi alishuka uwanjani pa kupuria, akafanya sawasawa na alivyoagizwa na mama mkwe wake. 7Boazi alikula na kunywa, akachangamka. Alikwenda kulala upande wa mwisho wa rundo la nafaka, naye Ruthu akaja kimya kimya, akafunua miguu yake, akalala. 8Usiku wa manane mtu huyo aliamka kwa mshtuko, akajigeuza. Mwanamke alikuwa amelala miguuni pake! 9Akauliza, “Wewe ni nani?” Akajibu, “Mimi ni Ruthu, mtumishi wako. Tandaza upindo wa vazi lako juu ya mtumishi wako, kwa maana wewe ni mkombozi wa jamaa.” 10Akasema, “BWANA akubariki, binti yangu! Fadhili hii unayoonyesha sasa ni kubwa kuliko ile uliyoonyesha mwanzo, kwa kuwa hukuwatafuta vijana kuolewa nao, wawe maskini au matajiri. 11Basi sasa, binti yangu, usiogope. Lolote utakaloomba nitakufanyia. Mji wote unajua kwamba wewe ni mwanamke mwema kweli. 12Ni kweli kwamba mimi ni mkombozi wa jamaa, lakini yuko mkombozi wa jamaa aliye ndugu wa karibu zaidi kuliko mimi. 13Kaa hapa usiku huu. Asubuhi, kama atakuwa mkombozi wako, vema, na afanye hivyo. Lakini kama hataki kukukomboa, basi hakika kama BWANA aishivyo, nitakukomboa mimi mwenyewe. Lala hapa mpaka asubuhi.” 14Basi alilala miguuni pake mpaka asubuhi, lakini aliamka kabla hakujawa na mwanga wa kutosha mtu kumtambua mwenzake. Naye akasema, “Isijulikane kwamba mwanamke alikuja uwanjani pa kupuria.” 15Kisha akasema, “Nipe mtandio ulioujifunika, uunyooshe.” Alipounyoosha, alimpimia vipimo sita vya shayiri ndani yake, akamtwika mzigo huo. Kisha akaenda mjini. 16Alipofika kwa mama mkwe wake, Naomi alimwuliza, “Mambo yako yamekuwaje, binti yangu?” Basi Ruthu alimweleza yote ambayo mtu yule alimtendea. 17Akasema, “Amenipa vipimo hivi sita vya shayiri. Aliniambia, ‘Usirudi kwa mama mkwe wako mikono mitupu.’” 18Naomi alisema, “Kaa hapa kwa utulivu, binti yangu, mpaka ujue mambo yatakavyokwenda. Mtu huyo hatapumzika mpaka amelimaliza jambo hili leo.”