Wafilipi 1

1Kutoka kwa Paulo na Timotheo, watumishi wa Kristo Yesu, kwa watu wote watakatifu wa Mungu katika Kristo Yesu walioko Filipi, pamoja na waangalizi na mashemasi. 2Neema na amani ziwe nanyi kutoka kwa Mungu Baba yetu na kutoka kwa Bwana Yesu Kristo.

3Kila ninapowakumbuka, ninamshukuru Mungu wangu. 4Katika kila ombi ninaloomba kwa ajili yenu nyote, siku zote ninaomba kwa furaha, 5kwa sababu tangu siku ya kwanza mpaka sasa mmeshirikiana nami katika kazi ya Injili. 6Nina hakika na jambo hili: aliyeanza kazi njema ndani yenu ataendelea nayo mpaka aikamilishe siku ya Kristo Yesu. 7Ni sawa kwangu kuwafikiria ninyi nyote hivi, kwa sababu mko moyoni mwangu. Ninyi nyote mnashiriki pamoja nami neema ya Mungu, nikiwa katika minyororo yangu na ninapoitetea Injili na kuonyesha kwamba ni imara. 8Mungu ni shahidi wangu jinsi ninavyomwonea shauku kila mmoja wenu kwa upendo mwororo wa moyo wa Kristo Yesu. 9Na hili ndilo ninaloomba: kwamba upendo wenu uzidi kufurika zaidi na zaidi, pamoja na ujuzi kamili na utambuzi wa kila aina, 10ili mweze kupima na kutambua mambo yaliyo ya maana kweli. Hapo siku ya Kristo mtakuwa safi na bila kujikwaa, 11mkiwa mmejaa tunda la haki linalozaliwa kupitia Yesu Kristo, ili Mungu apate utukufu na sifa.

12Ndugu, nataka mfahamu kwamba yaliyonipata yameisaidia Injili kusonga mbele badala ya kuizuia. 13Matokeo yake ni kwamba kikosi chote cha walinzi wa kifalme na wengine wote hapa wametambua kwamba niko katika minyororo kwa ajili ya Kristo. 14Tena minyororo yangu imewapa wengi wa ndugu uhakika katika Bwana, hivi kwamba wanathubutu kulinena neno kwa ujasiri zaidi sana na bila hofu.

15Ni kweli kwamba wengine wanamhubiri Kristo kwa wivu na roho ya kushindana; wengine wanafanya hivyo kwa nia njema. 16Hawa wanafanya hivyo kwa upendo, kwa sababu wanajua kwamba nimewekwa hapa ili kuitetea Injili. 17Wale wengine wanamtangaza Kristo kwa tamaa ya kujipatia makuu, kwa nia isiyo safi. Wanadhani wanaweza kuyafanya maisha yangu ya kifungoni kuwa ya maumivu zaidi. 18Hilo lina umuhimu gani? Muhimu ni kwamba kwa kila namna, ikiwa ni kwa kisingizio au kwa kweli, Kristo anatangazwa, nami nafurahi kwa hilo. Naam, nami nitaendelea kufurahi, 19kwa sababu najua kwamba kupitia maombi yenu na msaada anaotoa Roho wa Yesu Kristo, jambo hili litaishia katika wokovu wangu. 20Ninatarajia kwa hamu na kutumaini kwamba sitaaibika kwa jambo lolote. Badala yake, kwa ujasiri wote, sasa kama siku zote, Kristo ataonyeshwa kuwa mkuu katika mwili wangu, ikiwa ni kwa maisha yangu au kwa kifo changu. 21Kwa maana kwangu mimi, kuishi ni Kristo, na kufa ni faida. 22Lakini ikiwa maisha yangu katika mwili yanaendelea, hiyo ina maana ya matunda ya kazi yangu. Basi ningechagua lipi? Siwezi kusema. 23Ninavutwa pande mbili. Hamu yangu ni kuondoka katika maisha haya na kuwa pamoja na Kristo, kwa maana hilo ni bora zaidi sana. 24Lakini kwa ajili yenu ni muhimu zaidi niendelee kukaa katika mwili. 25Kwa kuwa nina hakika na hili, najua kwamba nitabaki, naam, nitaendelea kukaa pamoja nanyi nyote ili niwasaidie kusonga mbele na kupata furaha katika imani. 26Hapo, nitakapokuja kwenu tena, mtakuwa na sababu zaidi ya kujivuna katika Kristo Yesu kwa sababu yangu.

27Jambo moja tu: ishini kama raia kwa namna inayostahili Injili ya Kristo. Hapo, nikija kuwaona au nikiwa mbali na kusikia habari zenu tu, nitajua kwamba mnasimama imara katika roho moja, mkishindana bega kwa bega kama mtu mmoja kwa ajili ya imani ya Injili, 28wala hamwaachi wapinzani wenu kuwatisha kwa namna yoyote. Ujasiri huu ni ishara kwao ya maangamizi yao, bali kwenu ni ishara ya wokovu wenu, nao unatoka kwa Mungu. 29Kwa maana Mungu amewajalia, kwa ajili ya Kristo, si tu kumwamini, bali pia kuteswa kwa ajili yake. 30Mko katika mashindano yale yale mliyoniona nikiyapitia zamani, na ambayo sasa mnasikia kwamba bado ninayapitia.