Wafilipi 2

1Basi ikiwa kuwa ndani ya Kristo kunawatia moyo kwa namna yoyote, ikiwa upendo unawafariji kwa namna yoyote, ikiwa mnashiriki kwa namna yoyote katika Roho, ikiwa mna upendo mwororo na huruma, 2basi ijazeni furaha yangu hadi ifurike: muwe na nia moja, mshikamane katika upendo uleule, muwe wamoja moyoni, na mwelekeze mawazo yenu kwenye lengo moja. 3Msifanye lolote kwa roho ya kushindana wala kwa tamaa ya sifa tupu. Badala yake, muwe wanyenyekevu, kila mmoja akiwaona wengine kuwa bora kuliko yeye mwenyewe. 4Kila mmoja wenu ajali si mambo yake mwenyewe tu, bali pia mambo ya wengine. 5Kati yenu, fikirini kwa namna ambayo Kristo Yesu pia alifikiri. 6Yeye, ingawa alikuwa katika umbo la Mungu, hakuona kuwa sawa na Mungu kuwa jambo la kutumia kwa faida yake. 7Badala yake, alijifanya mwenyewe kuwa mtupu, akachukua umbo la mtumishi na kushiriki mfano wa wanadamu. Na alipoonekana kwa sura ya nje kama mwanadamu, 8alijishusha mwenyewe, akawa mtiifu hadi kufa, kifo cha msalabani. 9Ndiyo sababu Mungu amemwinua juu ya vyote, akampa kwa ukarimu jina lililo juu ya kila jina, 10ili mbele ya jina la Yesu kila goti lipinde, mbinguni, duniani na chini ya dunia, 11na kila ulimi utangaze waziwazi kwamba Yesu Kristo ni Bwana, na hivyo kumletea Mungu Baba utukufu.

12Basi, wapendwa wangu, siku zote mmetii. Endeleeni hivyo sasa, si kana kwamba niko pamoja nanyi tu, bali zaidi sana kwa sababu niko mbali: kwa hofu na kutetemeka, endeleeni kuufanyia kazi wokovu wenu wenyewe. 13Kwa maana ni Mungu anayetenda kazi ndani yenu, akiwapa kutaka na kutenda, kwa ajili ya mapenzi yake mema.

14Katika yote mnayofanya, epukeni kunung’unika na kubishana, 15ili mtu yeyote asiweze kuwalaumu, nanyi mbaki safi, watoto wa Mungu wasio na dosari katikati ya kizazi kilichopotoka na kuharibika. Kati ya watu hao mnang’aa kama nyota ulimwenguni 16mnaposhikilia kwa uthabiti neno la uzima. Kwa njia hiyo, siku ya Kristo itakapofika, nitaweza kujivunia kwamba mbio zangu hazikuwa bure, wala kazi yangu ngumu haikuwa bure. 17Na hata kama maisha yangu yanamiminwa kama sadaka ya kinywaji juu ya dhabihu na huduma ya kikuhani ambayo imani yenu inatoa, ninafurahi, na ninashiriki furaha yangu pamoja nanyi nyote. 18Vivyo hivyo, ninyi pia furahini, na mshiriki furaha yenu pamoja nami.

19Natumaini, katika Bwana Yesu, kumtuma Timotheo kwenu hivi karibuni, ili nami nitiwe moyo nitakaposikia habari zenu. 20Sina mtu mwingine mwenye moyo kama wake, ambaye atajali kwa kweli hali yenu. 21Wengine wote wanashughulikia mambo yao wenyewe, si mambo ya Yesu Kristo. 22Lakini mnajua jinsi alivyojithibitisha: kama mwana anayefanya kazi pamoja na baba yake, ametumika pamoja nami katika kueneza Injili. 23Kwa hiyo yeye ndiye ninayetumaini kumtuma mara moja, mara nitakapoona jinsi mambo yangu yatakavyokwisha. 24Tena nina hakika, nikimtegemea Bwana, kwamba mimi mwenyewe pia nitakuja hivi karibuni.

25Hata hivyo, nimeamua kwamba ni lazima nimrudishe kwenu Epafrodito. Yeye ni ndugu yangu, aliyefanya kazi pamoja nami na kupigana pamoja nami, naye ni mjumbe wenu, mliyemtuma kunihudumia katika mahitaji yangu. 26Kwa maana amekuwa akiwaonea shauku ninyi nyote, na amefadhaika sana kwa sababu mlisikia kwamba alikuwa mgonjwa. 27Kweli alikuwa mgonjwa, mgonjwa sana hata akakaribia kufa. Lakini Mungu alimwonea huruma, wala si yeye tu bali hata mimi, ili nisiwe na huzuni iliyoongezwa juu ya huzuni nyingine. 28Ndiyo sababu ninamtuma kwa haraka zaidi, ili mumwone tena na kufurahi, nami nipate kuwa na huzuni kidogo. 29Kwa hiyo mkaribisheni katika Bwana kwa furaha kamili, na watu kama yeye waheshimuni sana. 30Alifika ukingoni mwa kifo kwa ajili ya kazi ya Kristo, akiyaweka maisha yake rehani ili anipatie kile kilichokosekana katika huduma yenu kwangu.