Wafilipi 3

1Hatimaye, ndugu zangu, furahini katika Bwana. Kuwaandikia mambo yale yale tena si mzigo kwangu, nanyi yanawalinda.

2Muwe macho dhidi ya hao mbwa, muwe macho dhidi ya watenda kazi waovu, muwe macho dhidi ya wakatakataji wa miili. 3Kwa maana ni sisi tulio tohara: sisi tunaoabudu kwa Roho wa Mungu, tunaojivunia Kristo Yesu, na tusioweka tumaini letu katika sifa za kibinadamu, 4ingawa mimi mwenyewe ninazo sababu za kuwa na tumaini la namna hiyo pia. Ikiwa mtu mwingine yeyote anadhani ana sababu za kuweka tumaini katika sifa za kibinadamu, mimi nina zaidi. 5Nilitahiriwa siku ya nane. Mimi ni wa taifa la Israeli na wa kabila la Benyamini, Mwebrania mzaliwa wa Waebrania. Katika kuishika sheria nilikuwa Farisayo; 6katika bidii nililitesa kanisa; katika haki kama sheria inavyoieleza, sikuwa na lawama yoyote.

7Lakini chochote kilichokuwa faida kwangu, nimekuja kukiona kuwa hasara kwa sababu ya Kristo. 8Zaidi ya hayo, nayahesabu mambo yote kuwa hasara, kwa sababu kumjua Kristo Yesu Bwana wangu kuna thamani kubwa kuliko yote hayo. Kwa ajili yake nimepoteza kila kitu, nami nakihesabu chote kuwa mavi, ili nimpate Kristo 9na nionekane kuwa ndani yake, bila haki yangu mwenyewe inayotokana na kuishika sheria, bali nikiwa na haki inayopatikana kupitia imani katika Kristo: haki itokayo kwa Mungu, inayotegemea imani. 10Nataka kumjua yeye, kujua nguvu ya ufufuo wake, na maana ya kushiriki mateso yake, ninapofanywa kufanana naye katika kifo chake, 11nikitumaini kwamba kwa namna fulani nitafikia ufufuo kutoka kwa wafu.

12Simaanishi kwamba tayari nimepata haya yote, au kwamba tayari nimefanywa mkamilifu. Lakini ninaendelea kuyafuatilia, nikijitahidi kuyashika, kwa sababu Kristo amenishika mimi. 13Ndugu, sijioni kuwa nimekwisha kulishika. Ninazingatia jambo moja tu: nayaweka kando mawazoni yaliyo nyuma yangu, na kujinyoosha kuyafikia yaliyo mbele yangu, 14nami ninakimbia moja kwa moja kuelekea lengo ili nishinde tuzo iliyoahidiwa na mwito wa Mungu wa kwenda juu katika Kristo Yesu. 15Basi sisi sote tuliokomaa tuwe na nia hii. Na ikiwa mnafikiri tofauti katika jambo fulani, Mungu atawafunulia hilo pia. 16Hata hivyo, na tuendelee kwenda sambamba na hatua tuliyokwisha kufikia.

17Ndugu, ninyi nyote kwa pamoja fuateni mfano wangu, na wazingatieni wale wanaoishi hivyo, kwa kufuata kielelezo mlicho nacho kwetu. 18Kwa maana wengi wanaishi kama maadui wa msalaba wa Kristo. Nimewaambia habari zao mara nyingi, na sasa nawaambia tena kwa machozi. 19Mwisho wao ni maangamizi. Tumbo ndilo mungu wao, wanaona fahari katika mambo yanayopaswa kuwaaibisha, na mawazo yao yamejaa mambo ya dunia. 20Lakini uraia wetu uko mbinguni, na kutoka huko tunamsubiri kwa shauku Mwokozi, Bwana Yesu Kristo, 21atakayeibadilisha miili yetu hii ya hali duni na kuipa umbo lilelile la mwili wake wenye utukufu, kwa nguvu inayofanya kazi ambayo kwayo anaweza kuvileta vitu vyote chini ya utawala wake.