Maombolezo 3

¹Mimi ndiye mtu aliyeona mateso kwa fimbo ya ghadhabu yake.

²Amenifukuzia mbali na kunifanya nitembee gizani wala si katika nuru;

³hakika, amegeuza mkono wake dhidi yangu tena na tena, mchana kutwa.

⁴Amefanya ngozi yangu na nyama yangu kuchakaa na ameivunja mifupa yangu.

⁵Amenizingira na kunizunguka kwa uchungu na taabu.

⁶Amenifanya niishi gizani kama wale waliokufa.

⁷Amenizungushia ukuta ili nisiweze kutoroka, amenifunga kwa minyororo mizito.

⁸Hata ninapoita au kulia ili kuomba msaada, anakataa kupokea maombi yangu.

⁹Ameizuia njia yangu kwa mapande ya mawe, amepotosha njia zangu.

¹⁰Kama dubu aviziaye, kama simba mafichoni,

¹¹ameniburuta kutoka njia, akanirarua na kuniacha bila msaada.

¹²Amevuta upinde wake na kunifanya mimi niwe lengo kwa ajili ya mishale yake.

¹³Alinichoma moyo wangu kwa mishale iliyotoka kwenye podo lake.

¹⁴Nimekuwa kichekesho kwa watu wangu wote, wananidhihaki kwa wimbo mchana kutwa.

¹⁵Amenijaza kwa majani machungu na kunishibisha kwa nyongo.

¹⁶Amevunja meno yangu kwa changarawe, amenikanyagia mavumbini.

¹⁷Amani yangu imeondolewa, nimesahau kufanikiwa ni nini.

¹⁸Kwa hiyo nasema, “Fahari yangu imeondoka na yale yote niliyokuwa nimetarajia kutoka kwa Bwana.”

¹⁹Nayakumbuka mateso yangu na kutangatanga kwangu, uchungu na nyongo.

²⁰Ninayakumbuka vyema, nayo nafsi yangu imezimia ndani yangu.

²¹Hata hivyo najikumbusha neno hili na kwa hiyo ninalo tumaini.

²²Kwa sababu ya upendo mkuu wa Bwana, hatuangamii, kwa kuwa huruma zake hazikomi kamwe.

²³Ni mpya kila asubuhi, uaminifu wako ni mkuu.

²⁴Nimeiambia nafsi yangu, “ Bwana ni fungu langu, kwa hiyo nitamngojea.”

²⁵Bwana ni mwema kwa wale ambao tumaini lao ni kwake, kwa yule ambaye humtafuta;

²⁶ni vyema kungojea kwa utulivu kwa ajili ya wokovu wa Bwana.

²⁷Ni vyema mtu kuchukua nira bado angali kijana.

²⁸Na akae peke yake awe kimya, kwa maana Bwana ameiweka juu yake.

²⁹Na azike uso wake mavumbini bado panawezekana kuwa na matumaini.

³⁰Na atoe shavu lake kwa yule ampigaye, na ajazwe na aibu.

³¹Kwa kuwa watu hawakatiliwi mbali na Bwana milele.

³²Ingawa huleta huzuni, ataonyesha huruma, kwa kuwa upendo wake usiokoma ni mkuu.

³³Kwa maana hapendi kuwaletea mateso au huzuni watoto wa wanadamu.

³⁴Kuwaponda chini ya nyayo wafungwa wote katika nchi,

³⁵Kumnyima mtu haki zake mbele za Aliye Juu Sana,

³⁶kumnyima mtu haki: Je, Bwana asione mambo kama haya?

³⁷Nani awezaye kusema nalo likatendeka kama Bwana hajaamuru?

³⁸Je, si ni kwenye kinywa cha Aliye Juu Sana ndiko yatokako maafa na mambo mema?

³⁹Mwanadamu yeyote aliye hai aweza kulalamika wakati anapoadhibiwa kwa ajili ya dhambi zake?

⁴⁰Tuzichunguze njia zetu na kuzijaribu, na tumrudie Bwana Mungu.

⁴¹Tuinue mioyo yetu pamoja na mikono yetu kwa Mungu mbinguni, na tuseme:

⁴²“Tumetenda dhambi na kuasi nawe hujasamehe.

⁴³“Umejifunika mwenyewe kwa hasira na kutufuatilia; umetuchinja bila huruma.

⁴⁴Unajifunika mwenyewe kwa wingu, ili pasiwe na ombi litakaloweza kupenya.

⁴⁵Umetufanya takataka na uchafu miongoni mwa mataifa.

⁴⁶“Adui zetu wote wamefumbua vinywa vyao wazi dhidi yetu.

⁴⁷Tumeteseka kwa hofu kuu na shida ya ghafula, uharibifu na maangamizi.”

⁴⁸Vijito vya machozi vinatiririka kutoka machoni mwangu, kwa sababu watu wangu wameangamizwa.

⁴⁹Macho yangu yatatiririka machozi bila kukoma, bila kupata nafuu,

⁵⁰hadi Bwana atazame chini kutoka mbinguni na kuona.

⁵¹Lile ninaloliona huniletea huzuni nafsini kwa sababu ya wanawake wote wa mji wangu.

⁵²Wale waliokuwa adui zangu bila sababu wameniwinda kama ndege.

⁵³Walijaribu kukomesha maisha yangu ndani ya shimo na kunitupia mawe;

⁵⁴maji yalifunika juu ya kichwa changu, nami nikafikiri nilikuwa karibu kukatiliwa mbali.

⁵⁵Nililiitia jina lako, Ee Bwana, kutoka vina vya shimo.

⁵⁶Ulisikia ombi langu: “Usikizibie masikio yako kilio changu nikuombapo msaada.”

⁵⁷Ulikuja karibu nilipokuita, nawe ukasema, “Usiogope.”

⁵⁸Ee Bwana, ulichukua shauri langu, ukaukomboa uhai wangu.

⁵⁹Umeona, Ee Bwana, ubaya niliotendewa. Tetea shauri langu!

⁶⁰Umeona kina cha kisasi chao, mashauri yao yote mabaya dhidi yangu.

⁶¹Ee Bwana, umesikia matukano yao, mashauri yao yote mabaya dhidi yangu:

⁶²kile adui zangu wanachonongʼona na kunungʼunikia dhidi yangu mchana kutwa.

⁶³Watazame! Wakiwa wameketi au wamesimama, wananidhihaki katika nyimbo zao.

⁶⁴Uwalipe kile wanachostahili, Ee Bwana, kwa yale ambayo mikono yao imetenda.

⁶⁵Weka pazia juu ya mioyo yao, laana yako na iwe juu yao!

⁶⁶Wafuatilie katika hasira na uwaangamize kutoka chini ya mbingu za Bwana.