Ayubu 4

¹Ndipo Elifazi Mtemani akajibu:

²“Kama mtu akithubutu kuzungumza nawe, kutakukasirisha? Lakini ni nani awezaye kujizuia asiseme?

³Fikiri jinsi ambavyo umewafundisha watu wengi, jinsi ambavyo umeitia nguvu mikono iliyokuwa dhaifu.

⁴Maneno yako yamewategemeza wale waliojikwaa; umeyatia nguvu magoti yaliyokuwa dhaifu.

⁵Lakini sasa hii taabu imekujia wewe, nawe unashuka moyo; imekupiga wewe, nawe unafadhaika.

⁶Je, kumcha Mungu kwako hakupaswi kuwa ndiyo matumaini yako na njia zako kutokuwa na lawama ndilo taraja lako?

⁷“Fikiri sasa: Ni mtu yupi asiye na hatia ambaye aliwahi kuangamia? Ni wapi wanyofu waliwahi kuangamizwa?

⁸Kwa jinsi ambavyo mimi nimechunguza, wale walimao ubaya na wale hupanda uovu, huvuna hayo hayo hayo.

⁹Kwa pumzi ya Mungu huangamizwa; kwa mshindo wa hasira zake huangamia.

¹⁰Simba anaweza kunguruma na kukoroma, lakini bado meno ya simba mkubwa huvunjika.

¹¹Simba anaweza kuangamia kwa kukosa mawindo, nao wana wa simba jike hutawanyika.

¹²“Neno lililetwa kwangu kwa siri, masikio yangu yakasikia mnongʼono wake.

¹³Katikati ya ndoto za kutia wasiwasi wakati wa usiku, hapo usingizi mzito uwapatapo wanadamu,

¹⁴hofu na kutetemeka kulinishika na kufanya mifupa yangu yote itetemeke.

¹⁵Kuna roho aliyepita mbele ya uso wangu, nazo nywele za mwili wangu zikasimama.

¹⁶Yule roho akasimama, lakini sikuweza kutambua kilikuwa kitu gani. Umbo fulani lilisimama mbele ya macho yangu, kukawa na ukimya kisha nikasikia sauti:

¹⁷‘Je, binadamu aweza kuwa mwadilifu kuliko Mungu? Je, mtu aweza kuwa safi kuliko Muumba wake?

¹⁸Kama Mungu hawaamini watumishi wake, kama yeye huwalaumu malaika zake kwa kukosea,

¹⁹ni mara ngapi zaidi wale waishio katika nyumba za udongo wa mfinyanzi, ambazo misingi yake ipo mavumbini, ambao wamepondwa kama nondo!

²⁰Kati ya mawio na machweo huvunjwa vipande vipande; bila yeyote kutambua, huangamia milele.

²¹Je, kamba za hema yao hazikungʼolewa, hivyo hufa bila hekima?’