Ayubu 35

¹Ndipo Elihu akasema:

²“Je, unadhani hili ni haki? Wewe unasema, ‘Nina haki mbele za Mungu.’

³Bado unamuuliza, ‘Ni faida gani nimepata, na imenifaidi nini kwa kutokutenda dhambi?’

⁴“Ningependa nikujibu wewe pamoja na marafiki zako walio pamoja nawe.

⁵Tazama juu mbinguni ukaone; yaangalie mawingu yaliyo juu sana juu yako.

⁶Je, ukitenda dhambi, inamdhuruje Mungu? Kama dhambi zako zikiwa nyingi, hilo linamfanyia nini Mungu?

⁷Kama wewe ni mwadilifu, unampa nini, au yeye anapokea nini mkononi kwako?

⁸Uovu wako unamdhuru tu mtu mwingine kama wewe, nayo haki yako inawafaa wanadamu tu.

⁹“Wanadamu hulia kwa kulemewa na mateso; huomba msaada kutoka mkono wenye nguvu.

¹⁰Lakini hakuna asemaye, ‘Yuko wapi Mungu Muumba wangu, yeye anifanyaye niimbe usiku,

¹¹yeye atufundishaye sisi zaidi kuliko wanyama wa dunia, na kutufanya wenye hekima kuliko ndege wa angani?’

¹²Yeye hajibu wakati watu waliapo kwa sababu ya kiburi cha watu waovu.

¹³Naam, Mungu hasikilizi maombi yao ya ubatili; Mwenyezi hayazingatii.

¹⁴Si zaidi sana kwamba hatakusikiliza wewe usemapo humwoni, tena ya kwamba shauri lako liko mbele zake na wewe lazima umngojee,

¹⁵pia zaidi, kwamba hasira yake kamwe haiadhibu wala haangalii uovu hata kidogo?

¹⁶Hivyo Ayubu hufumbua kinywa chake kwa maneno yasiyo na maana; anaongea maneno mengi bila maarifa.”