Ayubu 26

¹Kisha Ayubu akajibu:

²“Tazama jinsi ulivyomsaidia mtu asiye na uwezo! Jinsi ulivyouokoa mkono ulio dhaifu!

³Ni shauri gani ulilompa yeye asiye na hekima? Nayo ni busara gani kubwa uliyoonyesha!

⁴Ni nani aliyekusaidia kutamka maneno hayo? Nayo ni roho ya nani iliyosema kutoka kinywani mwako?

⁵“Wafu wako katika maumivu makuu, wale walio chini ya maji na wale waishio ndani yake.

⁶Mauti iko wazi mbele za Mungu; Uharibifu haukufunikwa.

⁷Hutandaza anga la kaskazini mahali patupu; naye huiningʼiniza dunia mahali pasipo na kitu.

⁸Huyafungia maji kwenye mawingu yake, hata hivyo mawingu hayapasuki kwa uzito wake.

⁹Huufunika uso wa mwezi mpevu, akitandaza mawingu juu yake.

¹⁰Amechora mstari wa upeo juu ya uso wa maji, ameweka mpaka wa nuru na giza.

¹¹Nguzo za mbingu nazo zatetemeka, zinatishika anapozikemea.

¹²Kwa nguvu zake aliisukasuka bahari; kwa hekima yake alimkata Rahabu vipande vipande.

¹³Aliisafisha anga kwa pumzi yake; kwa mkono wake alimchoma joka aendaye mbio.

¹⁴Haya ni mambo madogo tu katika matendo yake; tazama jinsi ulivyo mdogo mnongʼono tunaousikia kumhusu! Ni nani basi awezaye kuelewa ngurumo za nguvu zake?”