Yobu 17

¹Omutima gwange gwennyise, ennaku zange zisalibbwaako, entaana enninze.

²Ddala abansekerera bannetoolodde; amaaso gange gabeekengera.

³“Ompe, Ayi Katonda akakalu k’onsaba. Ani omulala ayinza okunneeyimirira?

⁴Ozibye emitima gyabwe obutategeera; noolwekyo toobakkirize kuwangula.

⁵Omusajja avumirira mikwano gye olw’empeera alireetera amaaso g’abaana be okuziba.

⁶“Katonda anfudde ekisekererwa eri buli omu, anfudde buli omu gw’afujjira amalusu mu maaso.

⁷Amaaso gange gayimbadde olw’okunakuwala; omubiri gwange gwonna kaakano guli nga kisiikirize.

⁸Abantu ab’amazima beesisiwala olwa kino; atalina musango agolokokedde ku oyo atatya Katonda.

⁹Naye era abatuukirivu banaakwatanga amakubo gaabwe, n’abo ab’emikono emirongoofu baneeyongeranga amaanyi.

¹⁰“Naye mukomeewo mwenna kaakano, mujje, naye siraba muntu mugezi mu mmwe!

¹¹Ennaku zange ziyise entegeka zange zoonoonese, era bwe kityo n’okwegomba kw’omutima gwange.

¹²Abantu bano ekiro bakifuula emisana; mu kizikiza mwennyini mwe bagambira nti, Ekitangaala kinaatera okujja.

¹³Amagombe bwe gaba nga ge maka mwe nnina essuubi, bwe njala obuliri bwange mu kizikiza,

¹⁴ne ŋŋamba amagombe nti, ‘Ggwe kitange,’ era n’eri envunyu nti, ‘Ggwe mmange,’ oba nti, ‘Ggwe mwannyinaze,’

¹⁵kale essuubi lyange liba ludda wa? Ani ayinza okuliraba?

¹⁶Nalyo lirigenda eri enzigi z’emagombe Oba tuligenda ffenna mu nfuufu?”