Fakkeenya 18

¹Namni addaan of baasu ofittummaa duukaa buʼa; murtii dhugaa hundaanis ni morma.

²Namni gowwaan hubannaa argachuutti hin gammadu; garuu yaaduma isaa ibsuutti gammada.

³Yeroo hamminni dhufu tuffiin dhufa; salphinnis qaanii wajjin dhufa.

⁴Dubbiin afaan namaa bishaan gad fagoo dha; burqaan ogummaa garuu bishaan yaaʼuu dha.

⁵Gara nama hamaa goruun yookaan nama balleessaa hin qabne murtii qajeelaa dhowwachuun gaarii miti.

⁶Hidhiin gowwaa lola fida; afaan isaas rukutamuu itti waama.

⁷Afaan gowwaa badiisa isaa ti; hidhiin isaas kiyyoo lubbuu isaa ti.

⁸Dubbiin hamattuu akkuma gurshaa miʼaawuu ti; gara kutaa garaattis gad buʼa.

⁹Namni hojii isaa irratti dhibaaʼu, obboleessa nama waa balleessuu ti.

¹⁰Maqaan Waaqayyoo gamoo jabaa dha; namni qajeelaan itti baqatee badiisa oola.

¹¹Qabeenyi sooreyyii isaaniif magaalaa daʼoo qabduu dha; isaanis akka dallaa ol dheeraatti hedu.

¹²Kufaatiidhaan dura garaan namaa of tuula; gad of qabuun garuu ulfinaan dura dhufa.

¹³Utuu hin dhaggeeffatin deebii kennuun, gowwummaa fi qaanii dha.

¹⁴Hafuurri namaa dhukkuba ni obsa; hafuura cabe garuu eenyutu obsuu dandaʼa?

¹⁵Garaan nama hubataa beekumsa argata; gurri ogeessaas waan kana barbaada.

¹⁶Kennaan abbicha kennuuf karaa bana; fuula namoota gurguddaa durattis isa dhiʼeessa.

¹⁷Hamma namni biraa dhufee isaan mormutti, namni jalqabatti himata isaa dhiʼeeffatu tokko dhugaa qabeessa fakkaata.

¹⁸Ixaa buusuun wal falmii qabbaneessa; namoota wal lolan jajjaboos addaan galcha.

¹⁹Obboleessa yakkame tokko deebisuun magaalaa daʼoo qabdu irra ulfaata; wal falmiinis akkuma danqaraa karra dallaa dhagaa ti.

²⁰Ija afaan isaatiin garaan namaa quufa; dubbii arraba isaatiinis ni guuta.

²¹Arrabni humna jireenyaatii fi duʼaa qaba; warri isa jaallatanis ija isaa nyaatu.

²²Namni niitii argatu waan gaarii argata; fuula Waaqayyoo durattis surraa argata.

²³Hiyyeessi arraba laafaadhaan dubbata; sooressi garuu sagalee jabaadhaan deebii kenna.

²⁴Namni michoota baayʼisu ni bada; garuu michuun obboleessa caalaa namatti aanu ni jira.