Iyyoob 3

¹Kana irratti Iyyoob afaan isaa banatee guyyaa itti dhalate abaare.

²Innis akkana jedhe:

³“Guyyaan ani itti dhaladhe haa badu; halkan, ‘Ilmi dhalate!’ jedhame sunis haa badu.

⁴Guyyaan sun haa dukkanaaʼu; Waaqni ol gubbaadhaa isa hin ilaalin; ifnis itti hin ifin.

⁵Dukkannii fi gaaddidduun guddaan isa haa dhaalan; duumessi isa irra haa buʼu; ifa isaa dukkanni haa liqimsu.

⁶Halkan sana dukkanni limixiin haa qabatu; guyyoota waggaa keessa jiranittis hin dabalamin yookaan jiʼoota kam iyyuu keessatti hin lakkaaʼamin.

⁷Halkan sun haa maseenu; ililleenis keessatti hin dhagaʼamin.

⁸Warri Lewaataanin kakaasuuf qophaaʼan, kanneen guyyoota abaaran guyyaa sana haa abaaran.

⁹Bakkalchi barii kan guyyaa sanaa haa dukkanaaʼu; ifa eeggatee haa dhabu; boruu baqaqus hin argin.

¹⁰Inni ija koo duraa rakkina dhoksuuf, balbala gadameessa haadha kootii natti hin cufneetii.

¹¹“Ani maaliif gadameessa haadha kootii keessatti hin badin? Maaliifis yeruman garaa keessaa baʼetti hin duʼin?

¹²Jilbawwan na simatan, harmawwan ani hodhus maaliif achitti argaman?

¹³Ani silaa yoona nagaan nan ciisa; rafees nan boqodhan tureetii;

¹⁴moototaa fi gorsitoota addunyaa warra iddoowwan amma diigamanii jiran ofii isaaniitiif qopheeffatan wajjin,

¹⁵bulchitoota warqee qaban, kanneen manneen isaanii meetiidhaan guutatan wajjin nan boqodhan ture.

¹⁶Yookaan ani maaliifin akkuma mucaa duʼee garaa baʼee, akkuma daaʼima ifa guyyaa hin arginiitti hin awwaalamin?

¹⁷Achittis namoonni hamoonni jeequu ni dhiisu; dadhaboonnis achitti ni boqotu.

¹⁸Boojiʼamtoonni nagaadhaan walii wajjin jiraatu; waca cunqursitoota isaaniis hin dhagaʼan.

¹⁹Xinnaa fi guddaan achi jira; garbichis gooftaa isaa jalaa bilisoomeera.

²⁰“Maaliif warra gadadoo keessa jiraniif ifni warra lubbuun isaanii gadditeef immoo jireenyi kennama?

²¹Warra duʼa hawwanii dhabaniif warra qabeenya dhokfame caalaa duʼa barbaadaniif

²²warra yommuu awwaalamuu gaʼanitti gammachuun guutamanii ililchaniif jireenyi maaliif kennama?

²³Nama karaan isaa duraa dhokateef nama Waaqni dallaa itti marse jireenyi maaliif kennama?

²⁴Gaddi buddeena naa taʼeera; aaduun koos akka bishaanii dhangalaʼa.

²⁵Wanni ani sodaadhe natti dhufeera; wanni na naasisus narra gaʼeera.

²⁶Ani nagaa hin qabu; tasgabbiis hin qabu; jeequmsa malee boqonnaa hin qabu.”